Nagpatunga, nalatayan

CEBU, Philippines —  Patay diha-diha dayon ang usa ka 50-anyos nga lalaki human kini siya nalatayan sa duha ka truck diha sa National Highway sa Barangay Calajoan lungsod sa Minglanilla niadtong Biyernes sa alas 4:20 sa hapon.

Ang namatay mao si alyas Rowel, 50 anyos nga taga Barangay Poblacion lungsod sa Barili.

Samtang ang drayber sa Isuzu Dump Truck mao si alyas Orlando, 48, taga Dumaguete City Negros Oriental ug ang drayber sa Isuzu truck tractor head mao si alyas Joel, 49, nga taga Pitalo lungsod sa San Fernando.

Sa imbestigasyon sa kapolisan nasuta nga nagbiyahe ang mga sakyanan paingon sa habagatan.

Ang duha ka mga truck ang nag-okupar sa duha ka lanes pero adunay gamay nga agi-anan ang ilang tunga samtang dungan nga nagdagan.

Matud pa nga ang biktima nga nagmotorsiklo nipugos sa pagsulod niining gamay nga distansiya hangtud nga naigo siya sa walang ligid sa truck nga naa sa iyang tuo nga bahin.

Tungod ani wala na makontrolar sa biktima ang iyang manobela ug didto nasab siya napasok sa truck nga naa sa iyang tuo. Hangtud nga naligsan gyud kini sa duha nga maoy nakaingon sa iyang kamatayon.

Ang duha ka mga drayber sa truck ang gikustodiya sa kapolisan samtang nagpaabot kung unsa man ang desisyon sa pamilya sa namatay.