Charity match mikita’g sobra P16 milyones

CEBU, Philippines — Bisan wala mobutho sa Rizal Memorial Coliseum si acting Davao City Mayor Sebastian Duterte aron makig boksing sa gihagit niyang si Philippine National Police (PNP) chief Gen. Nicholas Torre III, mikita og dako ang event para itabang sa mga biktima sa kalamidad sa Luzon.

Tungod wala mopakita si Baste, si Torre maoy gideklarar nga winner by default.

Natigayon ang maong charity match human nga gisanong ni Torre ang hagit ni Duterte niadtong Hulyo 20 nga magsinumbagay silang duha.

Ang maong charity match gi-koberan sa halos tanang media outlets didto sa kaulohan ug gi-sanction sab sa Games and Amusement Board alang sa kaluwasan sa tanang boksidor.

Ang maong charity match nga gibansagang “Laban Para Sa Mga Nasalanta” giisip sa uban nga dili seryuso, binuang lang ni Duterte, apan sa gihapon miadto sa venue si Torre didto nga preparado.

Si Baste, anak ni kanhi presidente Rodrigo Duterte nga maoy nakadaog sa nakalabay nga piniliay, mao karoy acting mayor sa Davao City.

Tungod kay ang kanhi presidente napriso karon sa International Criminal Court tungod sa crime against humanity gumikan sa dugoong war on drugs sa dihang siya pa ang namuno sa nasud.

Si Torre pagkasayud sa hagit sa batan-ong Duterte midawat dayun niini ug gisugyot ang Rizal stadium isip maoy venue ug nipaubos dayun sa “boxing refresher training.”

Iyaha sab gisugyot nga tungod sa kadaghan sa naapektahan sa pagbaha sa Luzon sa miaging semana, himuon kining charity match aron ang kitaon ihatag sa mga biktima.

Hinuon dili lang sila ang unta magbinukbokay ibabaw sa ring, kay dunay lima ka undercard bouts nga gihimo nga padugang sa kalingaw sa mga tawong nanan-aw.

Apan bisan pa og wala motungha si Baste, daghang mga tawo ang nanan-aw ug namalit gyud og tiket.

Matud pa ni Torre moabot og P300,000 ang ticket sales ug dugang P16 million nga donasyon ang natigum sa maong event nga matud pa niya tanan ihatag sa mga nagkinahanglan ilabi na sa mga naapektahan sa baha.

Ang mga tiket nagkantidad og P100 sa Upper Box, P500 sa Lower Box, P3,700 para sa patron seats, ug P5,400 sa floor seats.

Human sa pagdawat ni Torre sa hagit, si Baste milatag og mga kondisyon: kinahanglang magpaubos sa hair follicle test ang tanang elected officials.

Apan pagka adlaw nga Biyernes, milarga si Baste ug iyang pamilya uban sa ilang staff ngadto sa Singapore ug gikan didto subli kining nipagawas og vlog nga nag-ingon nga wala siya pahibaw-a sa petsa sa ilang sangka, apan andam siya sa ubang mga adlaw.

Si Baste mipasangil hinuon nga gigamit ni Torre ang maong boxing match aron tabunan ang gitawag niyang “real issues” sa PNP. Nibuhi nasab siya og laing hagit ngadto sa heneral .

“Gusto mo, puntahan kita. Walang camera, suntukan tayo, walang gloves,” matud pa ni Duterte sa iyang podcast niadtong Hulyo 26.

Apan ang tubag ni Torre bahin ani kagahapon, silang duha lang ni Baste ang mopaubos sa maong test kay sila may magsangka.

Sa dihang gipangutana kung andam pa ba gihapon siya mosanong kung hagiton siya pag-usab sa laing mga adlaw, si Torre mitubag nga dili na niya kini hatagan pa og panahon tungod kay daghan pa siyang mas importanteng buluhaton.

Kun mahinumdoman, si Torre maoy hinungdan nga nadakpan ang supporter sa mga Duterte nga si Apollo Quiboloy niadtong tuig 2023 didto sa Davao City sa dihang si Baste pa ang mayor.

Ang heneral sab maoy ni-serve sa warrant of arrest gikan sa International Criminal Court batok ni kanhi presidente Duterte hinungdan sa pagkatanggong karon sa naulahi didto sa The Hague. — Report sa ABS-CBN/IBM (BANAT NEWS)