Puya gilabay sulod sa menteryo sa lungsod sa Compostela

CEBU, Philippines — Usa ka patay’ng puya ang napalgan sulod sa sementeryo sa sitio Rotonda, Barangay Cotcot Lungsod sa Compostela niadtong Sabado sa hapon, Hulyo 19, 2025.

Si Police Master Sergeant Daryl Rondina sa Compostela Police Station miingon nga nadawat nila ang maong kasayuran gikan kang Cogon Barangay Konsehal Geraline Minoza nga nangayo kanila og assistance labot sa puya nga nakit-an.

Matud pa ni Rondina nga usa ka pamilya nga mibisita sa lubong sa ilang amahan sa nahisgotang sementeryo maoy unang nakamatikod sa giputos nga plastic nga gibutang tapad sa lubong sa ilang amahan.

Dihang ilang gisusi ang sulod niini ilang nakita ang patay nga puya nga giputos og napkin ug gisulod sa plastic bag nga maoy nakaaghat kanila sa pagpahibalo sa mga barangay opisyal sa nahisgotang dapit.

Si Barangay Konsehal Minoza nga maoy nakadawat sa maong taho ang dali usab nga mipahibalo ngadto sa kapolisan aron dali nga masusi ug maimbestigar ang nilabay sa maong puya. Si Rondina miingon nga nagpadayon pa karon ang ilang imbestigasyon pagsuta kon kinsa ang nagbuntis nga kalit lang migamay ang tiyan. — /MEL (BANAT NEWS)