Garcia mokiha ni Archival ug Osmeña

CEBU, Philippines — Gihimakak ni kanhi Cebu City mayor Raymond Alvin Garcia ang mga alegasyon batok kaniya ni Mayor Nestor Archival, Sr. ug Bise Mayor Tomas Osmeña kabahin sa mga t-shirt nga gikatahong matag usa adunay kantidad nga P20,000.

Matud ni Garcia nga ang maong pasangil batok kaniya walay basehan ug adunay bulok politika.

Si Garcia nagkanayon nga si Archival ug Osmeña walay gipakita nga ebidensiya aron sa pagsuporta sa ilang alegasyon kabahin sa nahisgutang mga t-shirt.

Aron nga mahatagan og katin-awan ang maong pasangil nagpakita og dokumento si Garcia  ngadto sa mga sakop sa media nga ang sublimation-printed shirts o collared shirts kasagarang nagkantidad og P500 ngadto sa P600 ug layo ra sa giingong  P20,000 nga presyo sa matag t-shirt.

Gipadayag ni Garcia nga dili na unta siya manginlabot sa kasikas sa kagamhanan human siya nikanaog sa katungdanan tungod kay usa na siya ka pribadong indibidwal.

Apan padayon gihapon siya nga pangitaan og sayop ni Osmeña ug dili gyud siya magduha-duha sa pagtingog.

Matud ni Garcia nga pulos mga bakak ang maong mga alegasyon ug kun dili mangayo og pasaylo si Archival ug Osmeña mopasaka siya og kasong kriminal batok sa duha.

Sa iyang bahin, si Archival nipasabot nga “raw ug unverified” pa ang impormasyon nga iyang nadawat ug gipahigayon pa niya ang preliminary assessment sa mga operasyon ug pinansiyal nga sitwasyon sukad pa sa transisyon sa duha ka administrasyon.

Imbes nga mangayo og pasaylo, nidungag pa og laing pasangil si Osmeña batok kang Garcia kabahin sa laing tulo ka Nissan Urvans nga nagkantidad ngadto sa P6 milyones.

“Is this a responsible use of taxpayer money? Is this also a “baseless accusation,” considering the signature affixed to the purchase order?”, post ni Osmeña sa iyang Facebook page.

Dugang ni Osmeña nga nakaandam na usab ang mga kaso batok kang Garcia.  BDB BANAT NEWS