Rama miduso og election protest

CEBU, Philippines — Kapin usa ka semana na ang nilabay human ang midterm elections, wala pa gihapon mawagtangi og paglaum si Cebu City mayoral candidate ug kanhi mayor Michael Rama , pormal siyang misang-at og election protest diha sa Commission on Elections (COMELEC).

Si Rama mikompirmar niini kagahapon diha sa mga tigbalita pinaagi sa telepono, us aka oras human naduso ang protesta. Wa hinuon niya gidetalye ang mga legal nga argumento ug konteksto sa iyang protesta sa pagkakaron.

Si Rama ikatulo lang sa resulta sa maong piniliay, sa miaging semana iyang gikwestyon ang resulta ug kredibilidad sa Automated Counting Machines (ACM).

Sa update sa One News, apil sa gipangayo ni Rama sa iyang protesta ang paghimo og manual recount sa mga balota.

Kahinumdoman nga usa ka adlaw human sa eleksyon nagpatawag siya og press conference ug nipadayag nga di siya motahan, dungan sa pagbutyag nga bisan siya nakasinati og aberya sa iyang ACM nga nakaingon sa usa ka oras niyang pagpaabot aron maihap iyang boto diha sa makina.

Nagtuo siyang kining mga teknikal nga aberya sa ACM nakaapektar sa pagihap sa boto, ug gusto niya kining masubay uban sa iyang  nasudnong partido nga PDP–Laban.

Hinuon gi-congratulate niya ang mga kauban sa Partido BARUG nga silang reelected South District Congressman Edu Rama ug mga konsehal Philip Zafra, Francis Esparis, Mikel Rama, ug Harry Eran.

Si Cebu City mayor-elect Nestor Archival Sr. sa iyang bahin nipadayag sa iyang kaandam pagtubag sa protesta.

"Basically, he is entitled to his own imagination actually. Imagination ng Mike. Second, ang tawo sa Cebu nakahatag na sa ilang acknowledgment nga ako maoy angay. The third is, dili nako kinahanglan mu focus ana kay diri nata mu focus sa atong trabahuon," matud ni Archival.

Samtang si outgoing Mayor Raymond Alvin Garcia kinsa ikaduha sa ihap sa botos, miawhag ni Rama nga dawaton ang kapildihan ug ang resulta. Matud niya, dugay ang proseso sa protesta.

"I am not surprised because wala man siya mi concede so naa gyud to syay intention to file an election protest. Well, entitled man sya to his own opinion labi nag naka experience sya og murag delay sa pag cast sa iyang vote....pero ang akoa lang ana mas maayo nalang tingali we will just accept the result of the elections and we will just move forward and help each other," ni Garcia pa. (BANAT NEWS)