Barko nasangad, 500 pasahero gi-rescue
CEBU, Philippines — Moabot sa 500 ka mga pasahero ang na-rescue human ang roll-on-roll-off ferry nga ilang gisakyan nasangad sa pantalan sa Lungsod sa Jagna, Probinsiya sa Bohol niadtong Sabado, Abril 19, 2025.
Ang Philippine Coast Guard Central Visayas niresponde sa distress call gikan sa M/V Lite Ferry 5 kagahapon, Domingo.
Ang maong pasaheroang barko padulong unta sa Cagayan De Oro City apan giingong nasangad sa mabaw nga bahin sa maong pantalan. “The vessel, en route to Cagayan de Oro, was maneuvering to depart when it drifted into shallow waters due to low tide, approximately 200 meters from the port. A concerned citizen alerted CGSS Jagna," tipik sa pamahayag sa Coast Guard District Central Visayas.
Ang Coastal Guard mipadala og mga sakop uban sa ilang rubberboats ug gipakanaog ang mga pasahero ug gibalik sa pantalan.
Nakig-alayon sab ang Coast Guard sa Philippine Navy, Jagna Disaster Risk Reduction and Management Office, Bantay Dagat ug sa mga mananagat.
Ang insidente nahitabo niadtong Sabado sa gabii ug ang pag-rescue nahuman Domingo sa buntag, Abril 20.
Pagkagahapon sa buntag na-account na ang tanang 506 ka pasahero ug mga tripulante sa maong barko. Wala'y report nga dunay naangol sa hitabo.
Nihimo na ang PCG-7 og initial inspections sa barko ug nakita nga wala'y internal hull damage.
"Initial inspections revealed no internal hull damage, but a full marine safety and environmental assessment is underway," dugang pamahayag sa Coast Guard District Central Visayas.
Nagpadala sab sila og tugboat gikan sa Cebu aron guyoron padung sa lawom nga bahin ang maong barko. — /IBM (BANAT NEWS)
- Latest
