Mga basurang plastic sa dagat gihakot

CEBU, Philippines — Nagbawod-bawod nga basura sa baybayon sa Mahayahay 2, Barangay Pasil ning Dakbayan sa Sugbo gigamitan na og heavy equipment aron mahaw-as gikan sa dagat.

Sagad sa mga basura nga nakuha mao ang mga plastic nga botelya, mga panapton nga gianod gikan sa mga sapa ug mga dagkong kanal sa siyudad sa nangaging mga adlaw nga kusog ang bunok sa uwan.

Ang maong mga basura nagagikan sa pipila ka mga barangay nga nagsubay sa mga kasapaan nga mopatighug sa kadagatan sa Pasil.

Ang mga nagtipun-og nga basura naa ra gyud kini daplin sa mga kabalayan diin mahanggab nila ang baho ug kung mobawod moabot usab sa ilang balay ang hugaw sa tubig kun taub ang dagat.

Ang mga molupyo nanghunaw sa ilang mga kamot kay dili sila ang naglabay sa mga basura ug kay kini inanod gikan sa ubang mga barangay atol sa pagbunok sa kusog nga uwan. Naabtan sa Banat News ang Coastline Management Board ug ang Department of Public Service sa siyudad  adlaw nga Biyernes nga nanghaw-as sa tone-tonelada nga basura gikan sa maong dapit.  Sumala pa ni Bernard Maraasin sa DPS, kauban nila ang CMB  ug dili mominos sa 80 kapin ka mga TUPAD workers gikan sa 16 ka mga coastal barangays  nga nagtinabangay og hipos sa maong mga basura.

Karon adlawa adunay 160 ka TUPAD workers nga moapil sa cleanup apil kadtong mga gikan sa nananom og bakhaw sa Inayawan.

Ang pagpanglimyo sa maong dapit gisugdan na niadto pang Lunes.

Ang hepe sa Department of Public Services John Paul Gelasque nibutyag nga daw imbudo sa mga basura ang maong dapit kay 50 ngadto sa 90 ka tonelada nga basura ang ilang makolekta matag adunay citywide clean up.

Si acting Mayor Donaldo Hontiveros maoy mangulo sa clean up drive karon adlawa Sabado. IBM BANAT NEWS