Barangay responders gibansay aron malikayan ang sunog
CEBU, Philippines — Malaumon ang bag-ong gibansay nga mga barangay-based responders sa bukirang barangay sa dakbayan sa Sugbo nga way mahitabong forest fires karong panahon sa ting-init.
Kini human nigradwar ang dugang 200 ka barangay-based responders sa tulo ka adlaw nga advanced fire techniques training diha sa CREMDEC, sa Barangay Taptap ning siyudad niadtong Biyernes.
Lakip sa mga barangay nga naapil sa training mao ang barangay Adlaon, Agsungot, Babag, Bonbon, Budlaan, Buot Taup, Guba, Kalunasan, Lusaran, Mabini, Malubog, Paril, Pit-os, Pung-ol Sibugay, San Jose, Sinsin, Sirao, Sudlon 1, Sudlon 2, Tabunan, ug Tagba-o.
Una niini dunay laing batch sa mga barangay responders ang gipaubos usab og susamang training sa barangay Buhisan.
"Karong gipahigayon nga training usa gyud sa dako nga tabang nga makahatag og idea aron matabangan nato og pananglitan simbako og naa tay sunog sa atong mga forest ba ron or kanang sa bisa’g ginagmay lang nga mga sagbot," suma pa ni Edjyn Arda, usa sa mga gi-trained nga responders.
Si kanhi fire marshal ug karon CCDRRMO chief Aderson Comar mitudlo usab kanila kun unsaon sa paggama og improvised fire extinguisher gamit lang ang sabon ug tubig.
Niadtong miaging tuig adunay mga natala nga forest fires dinhi sa siyudad sa Sugbo ug kini naglakip sa insidente nga nahitabo sa sitio Baksan, Barangay Sapangdaku, ug laing tulo ka insidente sa barangay Pamutan, ingon man usa nga nahitabo sa sitio Kalubihan sa Barangay Kalunasan, ug sa tunga tunga sa Buhisan ug Toong ug sa sitio Danao², Barangay Busay. Samtang giumol usab sa siyudad ang Mountain Barangays DRRM Advisory Council.
Suma pa ni Ramil Ayuman ang chairperson sa Cebu City Disaster Risk Reduction and Management Council nga ang maong advisory council giumol aron moserbisyo isip usa ka consultative, ug collaborative body nga maoy moabag sa Cebu City Government sa pagpalig-on sa disaster risk reduction, preparedness, ingon man resilience efforts sa tanang barangay sa bukirang bahin sa siyudad sa Sugbo. (BANAT NEWS)
- Latest
