Babayeng modalaw gipatay

CEBU, Philippines — Usa ka babaye nga padung modalaw sa kapuyo ang gipusil patay sa wala pa mailhing mga tawo samtang ang biktima nagsakay pa og motorsiklo diha sa Cebu City Jail diha sa Barangay Kalunasan, Siyudad sa Sugbo kagahapon sa buntag, Biyernes, Abril 11, 2025.

Ang biktima mao si Glaiza Malabago Cabahug, taga Spoliarium Street, Barangay Duljo Fatima, siyudad sa Sugbo.

Nagkanayon si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga ang biktima nisakay og motorsiklo padung sa CCJ sa Barangay Kalunasan.

Padung kini mobisita sa iyahang kaipon nga napriso sa Cebu City Jail Dormitoryo tungod sa kasong kalapasan sa Republic Act 10591.  Apan wala na kini nakaabot sa iyahang tumong tungod kay gipusil kini sa gikasugat nga lalaking nagmotor.

"Mao atong gidudahan sa pagkakaron(riding-in-tandem ang suspects) but we are still reviewing CCTVs in the area to determine kung gakuyog ba gyud ni ang mao nga assailant sa pag-arrive at the location together sa ani nga motor," sigon ni Macatangay.

Duha ka anggulo ang gisubay karon sa kapulisan nga posibleng motibo sa krimen kini mao ang personal grudge ug kalambigitan sa illegal nga drugas.

Sa impormasyon nga gihatag matod pa sa pamilya ang biktima ug iyahang kaipon nag-away may labot sa ilang relasyon ug nibahad ang naulahi nga patyon kini.

Gisusi sab ang kalambigitan sa illegal nga drugas tungod kay ang biktima giingong na-rehabilitate na kaniadto gumikan matud pa sa paggamit og illegal nga drugas.

"So karon pa man ni nahitabo ang on-going pa ang pag investigate sa atoang kapulisan aning pagpamusil," sigon ni Macatangay.  IBM BANAT NEWS