Kuya Nick Pepito mopasubli sa PCL-Cebu

CEBU, Philippines — Nipadayag og kaandam si Konsehal Ricardo "Kuya Nick" Pepito nga mopasubli isip pangulo sa Philippine Councilors League-Cebu Provincial Federation human siya nasublian isip numero unong konsehal sa dakbayan sa Toledo.

Namulong niini si Pepito atol sa PCL Cebu end-of-term event dungan sa iyang pagpangayo og suporta sa mga konsehal sa tibuok lalawigan sa Sugbo alang sa laing termino.

"Today is not just a closing ceremony. It is a celebration — of service, of unity, and of commitment," matud ni Pepito kinsa naglingkod sa hunta probinsiyal isip ex-officio member sukad sa 2022.

Nagtinguha si Pepito nga mapadayun ang ilang mga programa ug ang panaghiusa sa PCL Cebu Chapter dili lang usa ka organisasyon kun dili isip usa ka pamilya sa panerbisyo.

"Sa tibuok termino, atong nakita kung unsa kakusgan ang panaghiusa sa mga konsehal sa Sugbo. We stood together in challenges, and we celebrated each other’s victories," matud ni Pepito

Gigamit sab ni Pepito ang maong kalihokan aron pasalamatan ang mga kaubanan sa PCL sa ilang suporta.

"Sa mga mosunod o mulabay'ng panahon, may we continue the vision of PCL Cebu Chapter. Sa uban natong konsehales, it may be the end of your term but now you are redirected to a different path with a bigger purpose. This is not goodbye. Kini usa ka pahimangno nga padayon ang atong misyon. Dili matapos ang serbisyo — molungtad kini hangtod anaa pa kita'y kasingkasing sa pagserbisyo sa katawhan," dugang pa ni Pepito.

Si Pepito unang napili isip konsehal niadtong 2001. Nisuway siya pagdagan isip bokal sa tersero distrito sa 2004 apan napakyas. Nibalik siya pagka konsehal sa 2007 hangtud na sa 2016.

Sa pagkapupos sa iyang termino, nisuway siya pagdagan pagka bise mayor apan napakyas. Nibalik pagka konsehal sa 2019 ug napili isip pangulo sa PCL Cebu Chapter niadtong 2022. — IBM (BANAT NEWS)