Bata patay, walo angol   

CEBU, Philippines — Usa ang patay samtang walo ang naangol sa nahitabong disgrasya sa Provincial Road, Cantumog, Lungsod sa Carmen sa miaging adlaw.

Ang namatay mao ang 9 anyos nga babaye nga nagpuyo sa Cansaga, Lungsod sa Consolacion.

Samtang ang mga naangol mao sila si alyas Jennifer, 35 anyos, taga Polpogan, Consolacion; alyas Cyrus, 11 anyos, residente sa Polpogan, Consolacion; alyas Rommel, 36 anyos, taga Cansaga, Consolacion; alyas Erlin, 34 anyos, residente sa Cansaga, Consolacion.

Laing mga naangol mao sila si alyas Vanz, 11 anyos, molopyo sa Cansaga, Consolacion; alyas Venz, 1 yr old, taga Cansaga, Consolacion ug alyas Maria, 54 anyos, nagpuyo sa Cansaga, Consolacion ug si alyas Benjamin, 57 anyos, molopyo sa Cansaga, Consolacion.

Nasayran nga duha ka pamilya ang sakay sa Suzuki Mini Van nga gimaneho kini ni alyad Ricky, 34 anyos, taga Polpogan, Consolacion.

Apan sa imbestigasyon sa Carmen Police Station nasuta nga overloaded ang maong sakyanan tungod kay 11 ka tawo ang sakay niini.

Padung na matud pa mamauli gikan sa Durano Eco-Farm Resort, apan pag-abot sa dulhogon nga bahin giingong nagkaproblema sa brakes sa sakyanan hinungdan nawagtangan og control ang driver ug nibangga sa punoan sa lubi ug nalimbuwad ang sakyanan.

Sa pikas bahin, maayong pagkapulpog sa usa ka motor ug naangol ang drayber niini human midasmag sa van diha sa Barangay Linao, Syudad sa Talisay kagahapon sa buntag.

Ang drayber sa motorsiklo nakaangkon og pangos sa iyang kalawasan. Ang drayber sa rent-a-car van nihulagway nga kusog ang pagpadagan sa motorsiklo nga iyang gikasugat.

Miigo kini diha sa wala nga bumper sa van nga niresulta sa pagkabuak sa headlight ug pagkabuslot sa iyang ligid. Samtang ang motorsiklo wa na maporma gumikan sa kagrabe sa pagbangga.

Gikan matud pa sa siyudad sa Sugbo ang motorsiklo paingon sa habagatan samtang ang van iya kining gikasugat. Ang nagmotorsiklo gitabang ug gidala sa tambalanan. (BANAT NEWS)