DEPW gipangayoan og report sa kalamboan sa CCMC

CEBU, Philippines — Gihangyo karon ang Department of Engineering and Public Works (DEPW) sa pagklaro sa pagkalakip sa duha ka elevators alang sa Cebu City Medical Center (CCMC) sa kontrata nga ilang gisumiter ngadto sa konseho bisan pa sa mga elevator nga napalit na pinaagi sa “Piso Mo, Hospital Ko” nga programa ni kanhi mayor Michael Rama.

Si Konsehal Jocelyn Pesquera nipadayag sa maong kalabalaka nunot sa tubag sa DEPW sa resolusyon sa konseho nga nangayo og klaro ug detalyadong breakdown sa scope ug cost per contract sa pagtukod sa CCMC.

Atol sa session sa konseho gipasabot ni Pesquera nga iyang giduso ang motion human nadiskubre nga duha ka kontrata sa construction gikan sa M.E. Sicat ug C.E. Padilla lakip gihapon ang pagpalit og elevators.

Gihatagan sa konseho ang DEPW og 15 ka adlaw o hangtud sa Mayo 13, 2025, aron isumite ang gipangayo nga mga dokumento.

Samtang sa report niini nga gisumite ngadto sa konseho ang DEPW nitala og kinatibuk-ang gasto sa pagtukod ngadto sa P1.13 bilyon alang sa CCMC.

 Base sa ilang talaan, ang phase 1 sa CCMC reconstruction nahatag ngadto sa C.E Padilla Construction Inc. sa kantidad nga P99.97 milyones.

Ang phase 2 nahatag usab sa C.E. Padilla Construction Inc., nga nagkantidad og P300 milyones.

Ang phase 3 nga naglakip sa pagkompleto sa una, lower, ug upper ground floors gihatag ngadto sa Charlz Construction sa kantidad nga P36.2 milyones.

 Gikataho nga ang pagtukod sa CCMC fit-out lobby gihatag ngadto sa McDhennizce Builders sa kantidad nga P4.9 milyones samtang ang phase 4 gihatag ngadto sa M.E. Sicat Construction ug AVECS Corporation nga adunay P916 milyones nga kantidad.

Base sasulat niini ngadto sa konseho, ang DEPW nipasabot nga ang “Clear and Detailed Coverage” nga gipangayo sa konseho mamahimong makuha sa “Detailed Estimate of Proposed Work,” nga naglatid sa tanang gasto nga naglakbit sa usa ka proyekto.

Nangatarungan usab ang DEPW nga aron masiguro ang pag-align sa R.A. No. 9184, mag-andam lang sila sa necessary works and documentation nga gikinahanglan ubos sa balaod.

Gikataho nga nunot sa anunsiyo nga hapit na mahibaw-an ang mananaog nga bidder sa CCMC project.

 Ang Cebu City Council nangayo og komprehensibong report sa DEPW sa kahimtang, kalamboan ug mga hagit sa proyekto.

Si Konsehal Nestor Archival, Sr. niduso og resolusyon kabahin sa maong hangyo tungod sa pagkalangay sa pagkompleto sa CCMC.

Sayo pa, si Cebu City Mayor Raymond Alvin Garcia nipahibawo nga iya nang hinganlan ang modaog nga bidder sa phase 5 sa CCMC diin nikabat ngadto sa P700 milyones ang kantidad.

Matud ni  Archival nga bisan pa sa maong pamahayag naobserbahan sa konseho nga walay as-built plans alang sa phase 1 ngadto sa 3 nga gisumite sa DEPW ngadto sa konseho alang sa documentation, review, ug transparency. (BANAT NEWS)