Babaye natagak, natusok sa kabilya

CEBU, Philippines — Natusok sa kabilya ang usa ka 36 anyos nga babaye diha sa ilaha dapit sa Sitio Crusan, Barangay Bulacao, Syudad sa Talisay kagahapon sa ala- una sa kadlawon, adlaw nga Domingo.

Ang naangol mao si Jumavel Abellana, 36, nagpuyo sa dapit. Si Belle Cabudbud, kapuyo sa biktima nihulagway nga nakainom ang kapuyo gikan kini nakiguban sa mga kaubang atleta kaniadto.

Matud pa nga nisaka kini sa ikaduhang andana sa ilahang panimay apan miadto kini sa wala pa mahuman og trabaho nga terrace aron unta mosuka.

Gialihan lang kini og hardiflex nga dili lig-on aron dili basta malahus apan gituohang nasandigan kini sa Abellana ug natagak sa ubos ug natusok sa nagsiwil nga kabilya.

Dali nga miresponde ang Bulacao Lifecare Emergency Team, City Disaster Risk Reduction and Management Office (CDRRMO) ug kabumberohan aron pagkuha kaniya.

Pipila ka minutos naputol ang kabilya nga natusok sa lawas sa biktima pinaagi sa hydraulic cutter. Matud pa ni Cabudbud nga nakalapos gyud ang kabilya sa lawas ug kini operahanan.

Sigon pa niya nga aksidente lang gyud ang nahitabo. (BANAT NEWS)