Nagpakatap og fake news gikasohan

CEBU, Philippines — Duha ka mga lalake nga giingong nagpakatap og mga fake news diha sa social media ang gipasakaan og kaso sa Police Regional Office(PRO)-7.

Nagkanayon si Police Colonel Arvie Aserre Paraon-Bueno, tigpamaba ni PRO-7 Regional Director Police Brigadier General Redrico Maranan,  ang mga gipasakaan og kaso kay taga Cebu City ug ang usa  taga Imus, Cavite nga gibanabanang nagpangidaron gikan 25 anyos  ngadto 45 anyos.

Matud pa sa kapolisan, ang post sa duha nagsige na og circulate sa social media sugod gipahigayon ang indignation rally nga gihimo sa Mandaue City sa niadtong Pebrero nga gitambungan sa kanhi presidente Rodrigo Duterte.

Sila gipasakaan og kasong kalapasan sa Article 154 sa Revised Penal Code o Unlawful Use of Means of Publication and Unlawful Utterances in relation to Section 6 sa Republic Act No. 10176 kun Cybercrime Prevention Act of 2012.

Matud ni Bueno ang rason nga gipasakaan sila og kaso tungod kay nag-post sila sa ilang Facebook ug TikTok accounts og mga false, edited, altered ug enhanced videos.

"Halimbawa po yung sa Mandaue, sinasabi nila na protest rally po yun sa Mandaue pero in fact yung place po (sa video) ay hindi po sa Mandaue outside jurisdiction ng PRO-7. Tapos ang event nun ay hindi po rally it’s either religious po o kaya mga concert po, mga entertainment activity sa ibang lugar," sigon ni Bueno.

Base sa imbestigasyon sa mga gi post sa duha,  nakamugna kini og “unnecessary panic” ug kalibog sa rehiyon partikular na sa Mandaue ug Cebu City.

Naapektuhan matod  ang komunidad tungod kay dunay mga appointments nga gikanselar kay nagtuo nga tinuod nga ingon niadto kadaghan ang nanambong sa protest rally sa Mandaue.

Dunay ubang motorista ang nangita og laing rota kay nagtuong ma-traffic sila sa dapit, apan sa pagkatinuod, wala sirad-i ang dalan ug wala maabot sa karsada ang mga nanambong sa indignation rally niadtong adlawa.

Tungod sab niini, naapektahan ang mga negosyanteng nagbiyahe og mga produkto.

Gawas  pa usab niini, mura og gipasanginlang bakakon ang Philippine National Police nga una nang nagpagawas og impormasyon bahin sa gidaghanon sa mga tawo nga nanambong aron mahatagan og ideya ang publiko. Ang crowd estimate nga gipagawas sa kapolisan nianang adlawa kaparehas sa crowd estimate nga gipagawas usab sa lokal nga Kagamhanan sa siyudad, apan ang gi-post matud pa sa gikasohan, dili mao.

"Doon po naka anchor ‘yung mga kaso na isinampa po sa  kanila...mga videos po ito, bali sa Facebook tsaka TikTok accounts po nila ‘yun ginamit. Sa ating cyber patrolling doon po nakita ang false news and false information po kaya yun nag-decide po rin ang mga investigators to file cases through the help of Regional Cybercrime Unit," ni Bueno pa.

Sa pagkakaron, wala gidakop ang maong mga lalake sanglit direct filing ang gihimo sa PRO-7 ngadto sa Prosecutor's Office sa Cebu City ug Mandaue City, for preliminary investigation na kini.

Ayha pa padad-an og subpoena ang mga gikasohan kung ma-raffle na ang kaso nga gidusoniadtong Huwebes, Abril 3, 2025.

"The dissemination of false information on social media is a serious offense that undermines public trust and safety. PRO7 is committed to identifying individuals involved in such activities for immediate legal actions. Convictions for such offenses can result in penalties of imprisonment for up to 12 years,"  pasidaan pa ni Maranan sa tanan.

Gipahinumdoman ni Maranan ang publiko nga aktibo ug padayon ang cyber patrollers sa PNP aron pag-monitor sa tanang online platforms aron pag-detect ug pagsanta sa mga nagpakatap og fake news. IBM BANAT NEWS