Sulod-gawas sa prisohan, napusilan

CEBU, Philippines — Naangol ang usa ka 53-anyos nga lalakeng giingong usa ka ex-convict human kini napusilan sa mga polis sa Abellana Police Station 2 Cebu City Police Office sa dihang gisita kini tungod sa reklamo sa mga tawo nga nagdala kini og armas diha sa Sitio Taop, Barangay Cogon Ramos, siyudad sa Sugbo, Miyerkules sa hapon, Marso 5, 2025.

Ang suspetsado mao si Edgar Parilla Arellano, 53, nagpuyo sa maong dapit.

Matud pa sa report gikan sa Abellana Police Station 2, dunay nitawg kanila  may labot sa armadong tawo nga nakit-an sa maong dapit. Sa pag-abot sa mga polis ilaha kining gikompronta apan giingong kalit lang kini nibunot og armas nga kalibre .38 revolver gikan sa iyang hawak ug namusil apan nikagar iyang armas.  Tungod sa iyang gibuhat gipusil kini sa batiis ug nadisarmahan. Ang suspetsado nadakpan na kaniadto sa Abellana Police Station 2 niadtong Hunyo 2017 sa kasong kalapasan sa Republic Act 9165 o ilegal nga drugas.

Nadakpan sab kini niadtong Enero 27, 2023 sa Police Station 2 Lapu-Lapu City Police Office tungod gihapon sa samang kalapasan. Nasikop sab ang dinakpan sa Minglanilla Municipal Police Station sa kasong homicide pag 2006 ug nakombikto kini sa kaso diha sa Regional Trial Court 12 ug naserbisyohan niya kini sa New Bilibid Prison sa Muntinlupa City. Naka-hospital arrest karon ang suspetsado ug pasakaan kini og kasong kalapasan sa Republic Act 10591 ug COMELEC Gun Ban. (BANAT NEWS)