Nang-hostage kay gibiyaan

CEBU, Philippines —  Napusilan ang usa ka 38-anyos nga lalaki samtang naangol usab ang iyang 44-anyos nga igsoon human sa hostagetaking ug pakigpinusilay sa suspek sa kapulisan sa Purok Zenia 1, Sitio Sun-ok, Barangay Tayud, Consolacion, alas 8 sa buntag.

Ang biktima giila nga si Ricky Brigoli, 38, samtang ang suspek mao si Marlon Brigoli, 44. Pareho silang residente sa Purok Zenia 1, Sitio Sun-ok, Barangay Tayud.

Sumala pa sa Consolacion Municipal Police Station, mitubag ang mga polis sa report bahin sa usa ka armadong lalaki sa maong lugar. Sa pag-abot sa mga otoridad, ilang nasugatan si Ricky nga adunay samad pinusilan.

Gitudlo sa biktima ang dapit diin nidagan ang suspek nga iyaha rang igsuon. Gigukod dayon kini sa mga polis apan giingong gipusil niya ang mga polis hinungdan nga nagkasinukliay og pinusilay ang mga polis hangtud nga naigo ang suspek sa iyang paa.

Narekober gikan sa suspek ang usa ka .22 Black Widow revolver nga adunay duha ka fired cartridges ug tulo ka buok live ammunition.

Gidala si Ricky sa Mendero Hospital alang sa pagtambal, samtang si Marlon gidala sa Eversley Childs Sanitarium and General Hospital nga nakaposas.

Sa video nga nakuha atol sa insidente, makita ang suspek nga nagkupot sa iyang .22 Black Widow revolver ug usa ka dakong bato, samtang ang napusilan niyang manghod nagpakiluoy kaniya nga mokalma.

Sa pakighinabi, gihulagway sa usa sa mga pag-umangkon sa suspek ang kahadlok nga iyang nasinati atol sa giingong hostage incident.

“Una niyang abot dili pa siya aggressive, pagka-duha niya’g balik aggressive naman. Lahi naman, isog naman kaayo siya’g mata,” matud niya sa pakighinabi sa Banat News.

“Lahi naman iyang nawng di naman maporma, murag desperado naman kaayo siya mamusil,” dugang pa niya.

Samtang, matud sa igsuon sa suspek nga si Len, dugay nang nagumon sa ilegal nga drugas ang suspek ug mausab ang iyang pamatasan kun makasuyop og ilegal nga droga.

Matud pa ni Len, nangita ang suspek sa iyang live-in partner nga iyang gituohang mibiya kay nikuyog og laing lalaki.  Sa dihang wala niya kini makita sa ilang balay giingong mipagawas siya og pusil ug gi-hostage ang iyang mga pag-umangkon.

Gibutyag usab nga sa niaging semana misulay usab pang-hostage ang suspek sa iyang live-in partner sa Sogod apan nakaikyas kini ug wala maabti sa kapulisan.

Miingon ang pamilya nga ipadayon nila ang pagpasaka og kaso batok sa suspek tungod sa kahadlok nga nahatag niini sa ilang pamilya ug sa komunidad.

Padayon ang imbestigasyon sa kapulisan samtang giandam ang angayng mga kaso batok sa suspek.