HVI sa Bohol nakuhaan og P20 milyones shabu

CEBU, Philippines — Nagtingkagol sa prisuhan ang usa ka 34 anyos nga high value individual human kini nakuhaan og binulto nga gituohang shabu ug armas atol sa buy-bust operation sa Provincial Intelligence unit-Police Drug Enforcement Unit sa Bohol Police Provincial Office(BPPO) sa Purok-1, Barangay Poblacion, Panglao, Probinsya sa Bohol kagahapon sa alas 5 sa buntag, Domingo, Pebrero 23, 2025.

Ang nadakpan mao si Clifford Autida, 34, driver ug nagpuyo sa Purok 2 Barangay Dampas, Tagbilaran City, Probinsiya sa Bohol.

Nasakmit sa mga operatiba gikan sa dinakpan ang 3,000 grams nga shabu nga nibalor og P20.4 milyones ingon man usa ka kalibre .45 nga armas nga dunay mga bala.

Sa impormasyon sa PIU-PDEU Bohol Police Provincial Office nga ang suspect usa ka high value individual ug giingong usa ka piniriso ang contact niini sa illegal drug trade.

Tulo ka semana nga gipaubos sa monitoring ang suspetsado  ug giingong ang area of distribution niini kay Panglao Island, Tagbilaran City ug ubang dapit sa 1st ug 2nd District sa Bohol.

Nadakpan sab sa kapolisan saLapu-Lapu City Police Office ang 29 ka tawo sa lainlaing kalapasan nga nahimo ug naskmit usab nila ang 87.44 gramo nga shabu nga nagkantidad tanan og P594.592.00 subay sa Drug Standard Price value niini.

Si Police Lieutenant Colonel Christian orres, tigpamaba sa LCPO miingon nga ang maong gidaghanon sa shabu gikan kini 13 ka mga pushers nga ilang nadakpan sa 12 ka mga drug operations nga nagsugod niadtong Pebrero 10 hangtod sa Pebrero 16, 2025.

Samtang sa ilegal nga sugal sama sa ilegal nga suwertres, hantak, tong-it ug uban pa ilang nadakpan ang 12 ka mga sugarol ug ilang nasakmit ang 2, 869.00 nga kuwarta nga naaktohan sa kapolidsan nga maoy hinungdan sa ilang pagkasikop. Sa kalapasan sa Comelec gun ban ilang nadakpan ang duha ka tawo nga naghupot og armas nga walay tukmang dokumento ug ang laing upat ang mitahan usab sa ilang armas alang sa pagtipig human sa pag-expire sa lisensiya niini. — /IBM