Driver gidunggab og gwardiya diha sa brgy carreta
CEBU, Philippines — Nalandig sa tambalanan ang usa ka 30-anyos nga lalake human gidunggab gamit ang kitchen knife sa 52-anyos nga lalakeng security guard sa wala'y igong rason sa sitio Kalapukan, Barangay Carreta, siyudad sa Sugbo, Domingo sa gabii, Pebrero 2, 2025.
Ang suspetsado mao si Fernando Mason Ballara, security guard nga nagpuyo sa sitio Semper, Barangay Carreta samtang ang biktima mao si Jerson Toring Ancajas, habal-habal driver ug molopyo sa sitio Kalapukan, Barangay Carreta ning siyudad.
Nagkanayon si Police Major Romeo Caacoy Jr., Hepe sa Mabolo Police Station 4 sa Cebu City Police Office nga kagahapon nadakpan sa mga Barangay Tanod ang suspect.
Base sa ilang imbestigasyon ang biktima nag istoryahanay sa iyahang silingan dihang kalit niabot ang suspetsado ug sa wala'y daghang pangutana gidunggab ang biktima ug misibat dayon.
Nakaangkon og samad dinunggaban sa tiyan ug kamot ang biktima ug gidala kini sa Vicente Sotto Memorial Medical Center.
"Base sa imbestigasyon namo gipangutana namo ang biktima ug katong mga witness dili man kuno ni sila kontra nikalit lang og abot ang suspect ug gidunggab siya, among palawman og maayo og unsay rason ani", sigon ni Major Caacoy.
Matud pa medyo nakainom ang suspetsado dihang nahimo niya ang krimen.
Pinaagi sa tabang sa mga Barangay Tanod nadakpan ra sab dayon ang suspetsado.
Susihon sab sa kapolisan kun dunay records ang suspect ug ang biktima sa police station. Narecover ra sab ang kitchen knife nga gigamit sa pagpanunggab nga dunay gitas-on nga 12 inches.
Gikatakda nga pasakaan og tukmang kaso ang suspetsado. (BANAT NEWS)
- Latest
