Talisay ubos sa heightened alert

CEBU, Philippines — Ubos karon sa heightened alert ang kapolisan sa Dakbayan sa Talisay gumikan kay hapit na magsugod ang Misa de Gallo o ang kadlawon nga pagsimba alang sa pagsaulog sa pasko.

Si Police Lieutenant Colonel Epream Paguyod, hepe sa kapolisan sa Dakbayan sa Talisay nagkanayon nga nasayod na ang iyang mga sakop nga dili na sila mahimo nga maka-absent o maka-leave sa ilang trabaho.

Kini aron mahatagan nila og pagtagad ang paghatag og kahapsay ug kalinaw sa kasaulogan.

Ang ilang pagpatuman sa hugot nga seguridad molahos ngadto na sa pagsugat sa bag-ong tuig.

Gipasabot ni Paguyod nga uban nila nga mag-monitor sa kadalanan ang mga kabomberohan, Barangay Tanke ug uban pa nga force multiplier.

Ang Dakbayan sa Talisay aduna kini walo ka dagko nga simbahan nga ilang bantayan.

Nagkanayon si Paguyod nga padayon usab ang ilang police visibility ug nihangyo sa mga Talisaynon nga dili maghurot sa paglakaw aron adunay mahabilin sa ilang pinuy-anan. BDB BANAT NEWS