Nasunogan sa sitio alegre nidawat na og tabang pinansyal

CEBU, Philippines —  Nanghatag na ang Department of Social Welfare and Development-VII sa mga gikinahanglan nga ayuda alang sa mga nasunogan sa sitio Alegre barangay Basak San Nicolas dakbayan sa Sugbo.

Kadtong tag-iya sa mga panimay nga hingpit nga naugdaw nakadawat og P10 mil kagahapon samtang kadtong mga nag-abang ingon man ang mga partially damage nga mga panimay nakadawat og tag P5 mil segun sat ahu sa Cebu City PIO.

Lakip sa gipanghatag sa DSWD-7 mao ang mga kitchen kits apil na ang mga kutasara, tinidor, plato, baso ug mga gikinahanglan sa pagpangluto sama sa kaha ug luwag.

Nakadawat na usab ang 189 ka pamilya nga apektado sa sunog og lima ka kilong bugas gikan DSWD-VII.

Samtang sa laing bahin si mayor Raymond Garcia sa iyang uwahing pagbisita sa evacuation area misaad nga mapadali ang pag-release sa ilang financial assistance.

Suma pa ni Garcia nga mobalik siya sa lugar aron mohatag og update kabahin sa yuta nga gipuy-an sa mga nasunogan.

Kini tungod kay ang maong luna gipanag-iya og pribado nga indibidwal ug ang tag-iya mipadayag nga dili na buot mobalik sa pagpuyo ang mga residente.

Niadtong October 27 daghan sa mga residente ang wa makahigayon sa pagdala sa ilang mga kabtangan sa pag-ulbo sa sunog.

Samtang sa laing bahin niabot na sa dul-an sa P120 milyones ang natala nga danyos sa Cebu City Fire Station sa mga sunog nga niulbo gikan sa Enero hangtud Oktubre 2024.  Sa talaan nga giluwatan sa tigpamaba sa Cebu City Fire Station nga si Senior Fire Officer 2 Wendell Villanueva, adunay natala nga 287 ka sunog nga niigo sa dakbayan ug gibana-bana nga moabot P118, 285,250.00 ang natala nga kinatibuk-ang danyos.

Dili mominos sa tulo ka mga arsonists ang napasakaan og kaso sa kabomberohan nga maoy hinungdan sa pag-ulbo sa sunog.  Sa mga niulbo nga sunog, ang 246 niini ang structural ug 41 ang non-structural.

Nakatala usab ang kabomberohan ug unom ang nakalas ug 39 nga angol sa sunog nga niulbo gikan sa Enero ngadto sa Oktubre 2024.

Gitug-an ni Villanueva sa sunog nga niulbo sa may Sitio Isla Alegre, Barangay Basak San Nicolas niadtong Domingo padayon pa nga giimbestigar.