SUV natagak sa pangpang, negosyante patay

CEBU, Philippines — Nakabsan sa kinabuhi ang usa ka 77-anyos nga lolo human nahagbong ang iyang sakyanan sa bung-aw sa Purok 7, Barangay Esperanza, Lungsod sa Aloguinsan, Dominggo sa hapon.

Ang biktima mao si Fedencio Cauba Manigos, negosyante ug residente sa Purok 3, Barangay Poblacion sa maong lungsod.  Sakay ang biktima sa iyahang Mitsubishi Montero Sports color black.

Gikan sa Lungsod niagi sa Tampaan, Esperenza access road ang biktima paingon sa Lungsod sa San Fernando.  Base giingon sa mga saksi ngadto sa kapulisan nga kusog ang dagan sa sakyanan.

Pag-abot sa dulhogon nga nga bahin sa karsada giingong nawad-an og kontrol sa manobela ang biktima gumikan sab sa kadaghang balas, bonbon ug graba.

Hinungdan nga nabalitok ang sakyanan ug nahagbong sa gibana-banang 170 meters nga gilawmon nga bung-aw.

Nakaangkon og grabing kadaot sa ulo, sa kalawasan ang biktima nga gidala sa Pinamungajan District Hospital apan gideklarar nga dead-on-arrival. (BANAT NEWS)