P32.546M SB alang sa usbaw sa sweldo aprobado na sa hunta probinsiyal

CEBU, Philippines — Giaprobahan sa hunta probinsiyal ang supplemental budget nga naggahin og P32.546 milyones alang sa unang tranche sa pag-usbaw sa sweldo sa mga empleyado sa Kapitolyo alang sa bulan sa Septiyembre hangtud sa Disyembre karong tuiga.

Si Bokal Glenn Anthony Soco, pangulo sa  committee on budget and appropriations sa hunta probinsiyal nagkanayon nga 19 ka elected nga opisyal, 774 ka permanente nga empleyado, 203 ka coterminous nga empleyado ug 282 ka  casual employees sa Probinsiya sa Sugbo ang makadawat og 3 ngadto sa 4 porsyento nga pag-umento sa sweldo depende sa ilang posisyon.

Ang umento sa sweldo subay sa Executive Order No. 64 ni Presidente Ferdinand Marcos, Jr. nga nagmando sa pag-umento sa sweldo sa mga empleyado sa gobiyerno gikan sa executive, legislative ug sa judiciary lakip na ang constitutional bodies, pipila ka GOCCs, ug tanang local government units sulod sa upat sa stages sugod karong tuiga.

Matud ni Soco nga adunay igong pundo ang Probinsiya sa Sugbo alang sa salary adjustment nga dili kinahanglan molapas sa budget limit sa personal services.

Ang maong supplemental budget gi-certify ni Gobernador Gwendolyn Garcia nga "urgent".

Nunot niini, gisugdan na sa Department of Education (DepEd) ang pag-process sa salary increase differentials alang sa mga magtutudlo sa pampublikong eskwelahan ug non-teaching personnel sa Fiscal Year 2024.

Si Education Secretary Sonny Angara nipahibalo nga ang DepEd nakadawat na sa pagtugot gikan sa Department of Budget and Management (DBM) aron ipadayon ang pag-apod-apod sa gibana-bana nga Php 26.9 bilyones nga salary differentials alang sa mga kwalipikadong empleyado.

Gikompirma usab ni Undersecretary for Finance Annalyn Sevilla nga sugod karong buwana ang mga magtutudlo ug mga kawani nga dili magtutudlo makadawat sa ilang salary differentials alang sa buwan sa Enero hangtud Agosto 2024 diin ang payroll sa Septiyembre gitugotan nga ilakip niini nga payments.

Gitataw ni Usec. Sevilla nga niadtong Agosto 31, 2024 ang DepEd Regions 1 (Ilocos Region), 3 (Central Luzon), ug MIMAROPA malampusong nakakuha sa ilang Notice of Official Salary Adjustment (NOSA) ug nagproseso na sa pagbayad sa salary differentials ngadto sa ilang mga empleyado.

Samtang gisugdan na sa Cordillera Administrative Region (CAR), Region 7 (Central Visayas), Region 10 (Northern Mindanao), ug Region 11 (Davao Region) ang partial release sa ilang NOSA. (BANAT NEWS)