Cortes gisuspenso sa Ombudsman sulod sa usa katuig

CEBU, Philippines — Si Mayor Jonas Cortes sa Dakbayan sa Mandaue gipaubos sa usa ka tuig nga suspension sa Ombudsman Visayas tungod sa kasong Grave Misconduct ug Conduct of Prejudicial to the Best Interest of the Service.

Nasayran nga ang maong kaso naggumikan sa pagtudlo ni Cortes kang Camilo Basaca isip officer in charge sa City Social Welfare Services niadtong tuig 2022.

Ang maong suspension order gidawat kini kagahapon sa buntag ni City Administrator Jamaal James Calipayan tungod kay atoa sa kaulohan si Cortes.

Ang kampo ni Cortes moapelar sa desisyon sa Ombudsman Visayas tungod sa taas-taas nga preventive suspension order nga gipahamtang batok sa mayor.

Giklaro ni Calipayan nga ang suspension order walay isyu sa korupsiyon ug dako ang pagtuo niini nga ang pagtudlo kang Basaca isip OIC sa CSWS aron walay ma-hamper nga mga serbisyo sa siyudad.

Wala pa usab masayod si Calipayan kong kinsa ang mopatuman sa maong suspension order tungod kay walay nakabutang kong kanos-a kini ipatuman.

Gipahibalo ni Calipayan nga ubos sa balaod kong masuspenso si Cortes ang bise mayor niini nga iyaha usab ka party mate ang molingkod isip acting mayor.

Gibutyag ni Calipayan nga aduna pay laing tulo ka kaso nga gipasaka batok sa mayor nga pulos nagtinguha sa pagkasuspenso niini.

Gipadayag ni Calipayan nga wala pa sila nagkahinabi ni Cortes tungod kay aduna kini mga kalihokan nga gitambongan.

Dugang ni Calipayan nga si Cortes padayon gihapon kini nga moserbisyo ug naninguha gihapon nga mahatag ang panginahanglanon sa mga Mandauehanon.