Pag-inspection sa gitukod nga mga bldg. gihingusgan sa OBO

CEBU, Philippines — Padayon ang Office of the Building Official (OBO) sa pagpahigayon og inspeksyon sa mga building aron masiguro ang seguridad ug luwas ang gipangtukod sa dakbayan.

Matud pa sa pangu sa OBO nga si Architect Florante Catalan nga moabot sa 1,005 ka mga building ang ilang na-inspeksyon sukad pa niadtong Enero hangtud karong Agusto 2024 diin 580 na kabuok ang napadad-an og Notice of Illegal Construction samtang 425 niini ang nagawsan og Notice of Violation.

“Mao man na ang atong mandate gud. As a building official or at the Office of the Building Official, ang atoang pinakauna is to enforce the law. Mura siya og enforcer. If naay enforcer sa dan, naa pod enforcer sa mga building structures. So, dili pwede mag-construct, dili pwede mag-tindog og structure ug balay or any if di ka mokuha og building permit. Dapat mokuha sa ka og building permit,” suma pa ni Arch. Catalan.

Gitin-aw ni Catalan nga tumong sa ilang buhatan nga matul-id ang mga sayop nga pamaagi sa pagtukod og mga istruktura dinhi sa dakbayan.

Gipahinumdum usab niini nga kun kinsa man ang adunay plano nga magtukod og building ug bisan unsa pa nga istruktura, kinahanglan nga mo-hire og architect o civil engineer aron maoy moplano sa pagtukod sa building ug kinahanglan sab nga magkuha daan og mga permit sa OBO.

Dugang pa niya nga mas gipadali na sa ilang buhatan ang pagproseso ug mga building permits diin mamahimo nang moapply online o pwede ra sab nga molahus sa ilang buhatan.

 “Less than an hour, kahibawo na ka unsay status sa imong building permit, whether approved or disapproved. So, walay rason nganong di mokuha og building permit”. suma pa ni Catalan.

Mapasalamaton usab si Catalan kang acting Mayor Raymond Alvin Garcia tungod kay gidungagan ang iyang mga sakop sa OBO ug mas mapalapdan pa nila ang ilang pagsusi sa gipangtukod nga mga building sa siyudad. MEL BANAT NEWS