E911 emergency hotline gilusad sa DILG
![E911 emergency hotline gilusad sa DILG](https://media.philstar.com/photos/2024/08/18/1_2024-08-18_22-38-44.jpg)
CEBU, Philippines — Gilusad sa Department of the Interior and Local Government (DILG) ang paspas ug mas maayo nga e911 emergency hotline gamit ang modernong teknolohiya aron mapadali ang pagtubag sa gobyerno sa mga emerhensya sa tibuok nasud.
Ang e911 naggamit og teknolohiya aron matumbok ang lokasyon kun asa gikan ang nangayo og tabang ug kini makonektar sa tanang emergency responders sa lokalidad sama sa bombero, medical responders, kapolisan ug uban pang mga units nga makatabang sa publiko. Itandi sa karaang sistema sa 911, mas gipadali niini ang pagpaabot sa impormasyon kay ang publiko mamahimong mo dial sa "1" alang sa police assistance ug "2" sa isyu sa trapiko, diin ang makadawat sa tawag maghatag ug mahinungdanong mga instruksyon aron matabangan ang publiko sa ilang mga problema.
Dili parehas sa 911 nga moagi pa og daghang proseso ug operators ayha pa moabot ang mensahe sa mga hingtungdan responders sa usa ka lugar.
Atol sa gipahigayong simulation sa e911 Service, si Department of the Interior and Local Government (DILG) Secretary Benjamin "Benhur" Abalos Jr. miingon nga pinaka importante nga madawat dayon ang mga emergency calls sa 911 call takers.
Adunay 20 ra ka mga pulis sa matag shift nga maoy nagbantay sa linya niini aron motubag ug mo-dispatch sa gikinahanglang emergency assistance.
Gibutyag ni Abalos nga sa wala pa ang 911 emergency service calls, sa 50,000 ka tawag nga ilang nadawat, ang 45,000 niini mga binuang o prank calls kada adlaw.
Karon iyang gipasidan-an ang publiko nga karon ma-trace na ang tanang gawas sa e911 system ug dali lang ang pagpasaka og kaso sa mga prank callers.
Nanghinaut ang DILG chief nga ang “e-911 Service" dili lang kutob sa PNP, Bureau of Fire Protection (BFP), ug Metropolitan Manila Development Authority (MMDA) kundili apil usab sa uban pang mga ahensya sa gobiyerno. — /IBM (BANAT NEWS)
- Latest