Drug den sa Tangke gironda sa PDEA, walo nasikop

CEBU, Philippines — Nagpahigayon og buy-bust operation ang Philippine Drug Enforcement Agency(PDEA)-7 Regional Special Enforcement Team uban ang Talisay City Police Station sa Sitio Salvador, Barangay Tangke, dakbayan sa Talisay nga miresulta sa pagguba sa drug den ug pagdakop sa walo ka tawo.

Ang mga nadakpan mao ang subject sa operasyon ug drug den maintainer nga si Ramil Abarquez, 55, kauban nga si Stephen Abarquez.

Nasikop sab ang giingong tulo ka tigbisitahan sa drug den nga sila si Reymark Abarquez, 30; Fidel Arnoco, 33; Areslito Dari Asuncion, 23; Feliciano Cabradilla,25; Rhemyan Villaruz, 21; ug Antonio Tangub, 43.

Nasakmit sa mga operatiba ang 13 ka putos sa gituohang shabu nga nitimbang og 16 gramos ug nagkantidad og P108,000, buy-bust money, cash nga nagkantidad og P500 ug gituohang halin sa illegal nga drugas ug nagkalain-laing drug paraphernalia.  Kasong kalapasan sa Sections 5, 6, 7, 13, 14, ug 26c, Article II sa Republic Act 9165 ang ipasaka batok sa mga suspetsado.

Sa pikas bahin, si PNP Chief Police General Rommel Francisco Marbil mimando nga targeton ang suppliers sa ilegal nga drugas ug dili lang motutok sa mga street-level nga pusher ug user.

Matud ni Marbil nga ang mga miagi nilang mga estratehiya nagpokus sa pagputol lamang sa ulo apan kinahanglan nilang targeton ang lawas o tibuok linya sa supply ug tinubdan sa illegal drug trade.  Ang bag-ong estratehiya magpasiugda og mas lig-ong intelligence operations ug kusog nga pag-apil sa komunidad aron targeton ang mga high-value drug personalities ug mabungkag ang mga drug trafficking networks, imbes nga magpokus sa mga street-level pushers ug users nga kasagaran mga biktima ra usab.  Aning paagiha, mas epektibo ug dili bayolente ang kampanya batok sa drugas pinaagi sa paghatag ug bili sa katungod sa tawo ug pag-atubang sa problema gikan sa pinakaugat niini. — /IBM (BANAT NEWS)