Managkapuyo gipamusil, lalaki patay
![Managkapuyo gipamusil, lalaki patay](https://media.philstar.com/photos/2024/08/18/3_2024-08-18_22-34-40.jpg)
CEBU, Philippines — Managkapuyo nga parehong ex-convicts ang gisulod sa ilang balay ug gipamusil sa mga armadong lalaki diha sa Sitio Micabaja, Barangay Duljo Fatima diin usa nila ang nakabsan sa kinabuhi.
Ang mga biktima mao sila si Saturnino Sericon Biscocho ug kapuyo nga si Maribell Fernan Pedroza, parehong ex-convict ang duha.
Sa impormasyong gihatag sa Mambaling Police Station 11, pasado alas 3 sa kaadlawon kagahapon sa dihang duha ka lalake nga nagsul-ob og itom nga jacket, shorts, kalo ug naka red mask ug laing kauban niini ang nisulod sa ilang gipuy-an ug gipusil silang duha sa makadaghang higayon. Si Saturnino nakaangkon og samad pinusilan sa agtang ug sa tuo nga aping nga maoy hinungdan sa iyahang kamatayon samtang si Maribell naigo sab sa agtang ug naa karon sa tambalanan. Wala pa matino kun unsa nga kalibre sa armas ang gigamit sa mga mamumuno.
Nagkanayon si Police Major Efren Diaz Jr., hepe sa Mabaling Police Station 11 nga nakakuha sila og CCTV footage diha sa lugar hinungdan nailhan na nila kun kinsa ang nagpusil sa mga biktima ingon man ang ilang backup nga nagsilbing spotter.
Naglakaw ra matud pa ang mga mamumuno human sa krimen apan nangita pa og dugang CCTV ang kapulisan sanglit ang Sitio Micabaja sudlunon nga dapit. Kalambigitan sa illegal nga drugas ang gitan-aw karon sa kapulisan nga motibo sa krimen.
"Upon investigation namo ang kaning lalake, ang biktima niduwa ni og illegal drugs, nadakpan ni sila pagka July na file-an sila og kaso sa Police Station 3 pero sa investigation namo dagko ni og batal ang lalake sa illegal nga drugas," ni Major Diaz pa. — /IBM (BANAT NEWS)
- Latest