Iregularidad sa road project sa Cebu City paimbestigahan
CEBU, Philippines — Paimbestigahan sa konseho sa Dakbayan sa Sugbo ang giingong iregularidad sa phase 2 sa road opening project gikan sa Barangay Poblacion, Pardo human kini na-award ngadto sa usa ka contractor bisan og walay pagtugot ang plano niini gikan sa konseho.
Niadtong Agosto 14, 2024, giaprobahan sa konseho sa siyudad ang giduso nga resolusyon ni Konsehal Jocelyn Pesquera. Tumong sa maong resolusyon nga aprobahan ang road opening project gikan sa Barangay Poblacion, Pardo, ug Barangay Quiot paingon sa Barangay Toong nga adunay kinatibuk-ang gitas-on nga 2.6 kilometros ug 20 metros ang gilapdon.
Si Konsehal Nestor Archival, Sr. nibutyag nga nikabat ngadto sa P150 milyones ang kantidad sa maong proyekto.
Niadtong tuig 2004 nasuta sa kagamhanan sa siyudad nga gikinahanglan ang pag-abli og karsada gikan sa Poblacion Pardo paingon sa Toong aron mahatagan ang katawhan sa Toong ug Pamutan og mas maayong access road ug aron molambo ang ekonomiya sa maong mga barangay.
Apan atol sa diskusyon gikuwestiyon ang mga proseso sa proyekto hinungdan nga giaprobahan ang corollary motion ni Konsehal James Anthony Cuenco, chairman sa committee on transportation nga magpatawag og executive session aron mahatagan og katin-awan ang maong isyu.
Si Konsehal Jerry Guardo, chairman sa committee on infrastructure ang nikompirma nga na-award na ang maong proyekto apan matud niini wala niya mahibaw-I kinsa ang contractor nga gihatagad sa award.
Matud ni Guardo nga gisumiter niya sa konseho apan gi-defer kini gumikan sa mga isyu. Samtang si Peaquera nagkanayon nga kinahanglan una nga aprobahan sa konseho ang road plan.
Sa iyang bahin, si Archival nagkanyon nga kinahanglang aprobahan una ang plano sa dili pa kini i-bid out o i award ngadto sa usa ka contractor.
Ang executive session ipahigayon sa Septiyembre 25, 2024 diin imbitahan sa pagtambong niini ang mga representante gikan sa Department of Engineering and Public Works (DEPW), Department of Public Works and Highways (DPWH) - District Engineering Office, City Planning, Cebu City Environment and Natural Resources Office (CCENRO), ug ang Bids and Awards (BAC) nga mi award sa maong proyekto. — /BDB (BANAT NEWS)
- Latest