90-anyos nga lola nakadawat og P20 mil nga financial assistance
CEBU, Philippines — Midawat og P20mil nga financial assistance ang 90-anyos nga lola nga gihatag sa lokal nga kagamhanan sa siyudad sa Talisay.
Si Talisay City mayor Gerald Anthony “Samsam” Gullas personal nga mibisita sa panimay ni Nanay Milagros Adlawan didto sa Barangay Linao.
Si Nanay Milagros nitungtong sa pangidaraon nga 90-anyos niadtong Hulyo 15 ning tuiga hinungdan nga giproseso dayon ang rekisitos aron madawat ang financial nga ayuda.
Base sa ordinansa sa siyudad, ang P100,000 nga madawat nga financial assistance sa mag edad og 100 gibahin-bahin kini aron sa sayo pa lang nga pangidaron mapahimuslan na kini.
Ang nagpangidaron og 90-anyos makadawat og P20mil, ang 95-anyos modawat og P30mil ug motungtong na sa 100 nga pangidaron modawat kini og P50mil.
Matud pa ni Gullas nga gituyo nila kini aron mapahimuslan sa mga senior citizen ang lain nila nga benepisyo gikan sa kagamhanan.
Siya naglaraw nga mangita pa og paagi nga madungagan ang ilang mahatag. (CEBU NEWS)
- Latest
