Garcia nimando paglimpyo sa sapa sa Brgy Mambaling

CEBU, Philippines — Naglaundok nga basura nga nilungtad na og duha ka dekada nga nakabara sa sapa sa interior nga bahin sa Barangay Mambaling dakbayan sa Sugbo hatagan na og kasulbaran.

Si acting Cebu City Mayor Raymond Alvin Garcia personal nga nakakita sa kahimtang sa sitio Naba Alaska, Barangay Mambaling human nangayo og tabang ang barangay sa dugay na nila nga suliran.

Ang mga basura makita sa may taytayan sa sitio Wangyu nga nakaali sa agianan sa tubig, apan ang mas dako nga problema tua sa sudlonon nga bahin sa sitio Naba diin masimhotan na ang nangalisbo nga baho ug makita nga nahisama na sa usa ka landfill ang lugar. Tungod sa kadaghan sa basura wala nay kaagian ang tubig hinungdan nga mosulod na sa mga balay nga naa sa dapit ilabi na kun dunay ulan.

Ang mga residente naanad na usab sila sa pagsimhot sa kabaho sa ilang palibot apan nabalaka gihapon sa epekto niini sa panglawas ilabi na sa mga bata, busa nihangyo sila nga adunay kongkretong aksyon ang kagamhanan sa problema.

Si Garcia nisusi sa maong dapit, human ang barangay nagpakitabang sa siyudad aron makahuwam ug mga kagamitan alang sa pagpahigayon og dredging sa maong dapit.

Sumala pa ni Garcia nga nihangyo kaniya si kapitan Seller Salvador, hinungdan nga nihimo siya og pakisusi.

Base sa pamahayag sa kapitan, kinahanglan ibalhin una ang dili mominos 21 ka pamilya nga naa nanimuyo sa maong dapit aron mapahigayon ang pagpalimpyo sa lugar.

Gimando sa acting mayor ang dinalian nga paglimpyo sa dapit aron masugdan gilayon ang pagpalalom ug pagpalapad sa maong sapa.

Lakip usab sa gibisita ni Garcia ang sitio Lawis Alaska gumikan kay dul-an sa tulo ka tuig na human sila nasunogan apan hangtud karon wala pa gayud silay koryente.

Ang kadadkuan sa VECO nipasalig usab kang Garcia nga mapasigaan ang maong dapit basta kompleto kini sa mga papelis sama sa electrical permit. (BANAT NEWS)