Imahen sa Senyor nipatulo og luha?

CEBU, Philippines — Usa ka imahe sa Senior Sto. Niño de Cebu nga gipanag-iya og pamilya diha sa Sitio Tayud, Barangay Basak Pardo ning Dakbayan sa Sugbo ang gikatahong nipatulo og luha.

Si Geraldin Carumba, miingon nga adunay  silingan nga miingon kaniya nakakitang ‘nihilak’ ang imahe sa Balaang Bata.

Dihang iyang gitan-awn ug nakita niya ang pagdagayday sa tin-aw nga likido nga gituohan niyang luha gikan sa wala nga mata sa maong imahen.

Gitrapohan kini ni Carumba sa iyang kamot apan nagpadayon gihapon ang pagtubod niini , giangkon niya nga dili masabot ang iyang gibati atong panahona.

Giklaro niyang wala mabasa og tubig ug wala usab mga bangag ang imahe nga mahimong masudlan og tubig. Dako iyang pagtuo nga milagro kadto.

Matud niya milanat og usa ka oras ayha pa kini nihunong pagtubod apan daghan  ng mga tawo ang nakapahid sa ilang dalang panyo.

Dako iyang pagtuo nga adunay dalang mensahe ang pagluha sa imahen ilabi na daghang karon mga panghitabo og trahedya nga nahitabo sa kalibutan.

Ang imahen gilimpyohan adtong tungora kay dad-on kini ngadto sa lungsod sa Alcoy kay mobalhin na didto ang tagiya.

Si Rowena Diosana, kinsa nakasaksi sab sa hitabo maoy nikuha sa video ug dili siya makatuo sa maong nasaksihan nga nakapanglimbawot sa iyang balahibo.

Nagtuo siyang ang Balaan nga Bata maoy manalipod kanila gikan sa mipapahawa kanila sa ilang gipuy-an karon, nag-ampo siyang magdala kini kanila og grasya. Tungod sa nahitabo, ilahang gihangyo ang tag-iya sa imahen nga ipabilin kini sa ilang dapit.

Ang nag upload sa video diha sa social media nga si Camille Rose Carumba miklaro nga dili pang ‘clout chasing’ang pag-post niya sa video. Matud pa niya, tinuod ang ilang nakita, bahala pa og unsay ikasulti sa uban.

Apan ang Chairman sa Committee on Worship sa Archdiocese of Cebu Fr. Glenn Therese Guanzon nibutyag nga dili pa angay tuohan nga kini milagro kay kinahanglan pa kining moagi og makuti nga imbestigasyon sa mga eksperto sa simbahan.

Samtang si Fr. Japhet Geonzon, assistant chairman on the Commission on Worship of the Archdiocese of Cebu, nitug-an nga bugtong ang Vatican lang maoy makasulti kong milagro kini ilabi na kun mapamatud-ang nahitabo kini “beyond natural phenomenon.”

Sila miawhag sa katawhan nga dili dayon motuo og mga milagro ug pamalandongan kung iya kini sa Ginoo o sa pikas. --  IBM BANAT NEWS