Super Health Center sa Talisay gisugdan na og trabaho

CEBU, Philippines — Gipahibawo ni Talisay City vice mayor Richard Francis “Choy” Aznar nga gisugdan na ang pagtrabaho sa Super Health Center sa Dakbayan sa Talisay nga nahimutang sa Barangay Lagtang.

Si Aznar nitataw nga lakip sa nahisgutan sa State of the Nation Address (SONA) ni presidenti Ferdinand Marcos Jr. mao ang Super Health Center nga daku kaayo og ikatabang sa katawhan alang sa maayong serbisyo sa panglawas.

Ang Talisay adunay Cebu South Medical Center pero ang Super Health Center maoy modugang nga moatiman sa mga masakiton.

Nagkanayon ang bise mayor nga kun operational na ang Super Health Center makatabang kini aron makuha-kuhaan ang mga pasyenti diha sa unang hospital sa Talisay.

Asoy pa niya nga dili man mahisama ang serbisyo sa Super Health Center ngadto sa Cebu South Medical Center pero mahimo ra kini nga moatiman sa pasyenti nga dili kaayo grabe ang kahim. (BANAT NEWS)