Motor kusog og dagan nisampak sa center island, rider patay
CEBU, Philippines — Patay diha-diha ang usa ka 22-anyos nga lakake human nabangga sa center island sa dalan F. Llamas Street, Barangay Tisa, siyudad sa Sugbo ang gimanehong motorsiklo pasado alas 3 sa kaadlawon kagahapon, Huwebes, Hulyo 25, 2024.
Ang namatay mao si Jesus Cañete II Jr., residente sa Barangay Basak-San Nicolas ning siyudad nga nagmaneho sa Honda Mio nga motorsiklo nga dunay plate number G468BQ.
Ang 21-anyos nga amigo sa namatay miingon gikan sila nag-inom sa Barangay Guadalupe. Pagpadulong nila uli gauna siya apan giapas siya sa lain nilang kauban ug gipahibawo nga nadisgrasya ang ilang amigo maong ilaha kining gibalikan.
Gihimakak niya nga naglumba ug kusog ilang padagan, sukwahi sa mga pamahayag sa mga tawo sa nahitaboan. Apan sa kuha sa CCTV, nakita nga kusog ang dagan sa namatay pagsampak sa center island.
Sa imbestigasyon sab sa Traffic Enforcement Unit sa Cebu City Police Office (CCPO) kusog ang dagan sa motorsiklo kay layo og naabtan ang motor. Niabot og 19.35 metros ang distansya sa motor ug sa lawas sa namatay ug nabungkag ang full-faced helmet niini.
"Medyo kusog-kusog gyud siya kay og hinay pani diha ra na iyang motor natumba," sigon ni PSSgt. Lito Busalanan, imbestigador sa TEU CCPO.
Samtang napisat ang bukton sa usa ka babayeng trabahante sa Cebu City Health Department human kini malatayi og modern jeepney diha sa Barangay Tabunok, Dakbayan sa Talisay kagahapon sa buntag.
Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga parehong padulong sa siyudad sa Sugbo ang biktima ug ang modern jeepney.
Matud pa ni Tumulak nga hinay ra ang dagan sa mga sakyanan kay adunay laing sakyanang naaberya sa dapit. Ang drayber sa modern jeepney natingala sa dihang adunay nipaka sa iyang kilid ug iyang pagtan-aw a naghigda sa karsada ang biktima.
Gitabang ang biktima ug gidala sa Cebu South Medical Center samtang ang drayber gikustodiya sa kapolisan. — Gabriel Bonjoc/IBM BANAT NEWS
- Latest
