‘Palawan Boys’ sa Cebu City Hall paimbestigahan

CEBU, Philippines — Gibantayan karon sa kagamhanan sa Dakbayan sa Sugbo ang giingong kaso sa infidelity diha sa city hall.

Ug giawhag nga imbestigahan ang taho nga adunay grupo sa mga lalaki nga mamiktima og mga job order.

Niadtong Martes, Hulyo 23, 2024, usa ka social media page ang nag-post og pasangil nga adunay grupo sa mga tiguwang nga lalaki nga gitawag og "Palawan Boys" nga mamiktima og mga JO diin ilaha kining haylohon og kwarta bugti sa romansa.

“Dunay groupo sa mga tiguwang diha sa city hall nga gitawag ug PALAWAN BOYS diin ilang target mga JO ilang tintalon pinaagi sa kwarta nga ipadala sa Palawan. Unya ug madala na ila dayon e-abang og balay para adto romansa”, tipik sa post.

Sa samang post, gipasanginlan usab niini ang usa ka department head sa city hall nga adunay kabit ug gani aduna pay nag-away tungod niini sulod sa usa ka buhatan sa kagamhanan sa siyudad.

Si Henry Tumalabcad, hepe sa Human Resource Development Office (HRDO) nagkanayon nga nakadungog na sila sa maong insidente apan wala pa sila makadawat og pormal nga reklamo kabahin niini.

Matud ni Tumalabcad nga sa HRDO aduna sila’y Employees Relation Discipline (ERD) diin ang mga reklamo batok sa mga empleyado, department heads, nadawat ug gihimoan og aksiyon lakip na ang clarificatory conference.

Kabahin sa mga kaso sa infidelity, si Tumalabcad nagkanayon nga importante ang pormal nga reklamo nga ipasaka diha sa ilang buhatan aron mabuhatan og tukmang aksiyon.

Subay niini, nanawagan si Tumalabcad sa mga empleyado o kapikas nga nakasinati og susamang sitwasyon nga mopasaka og pormal nga reklamo diha sa ilang buhatan.

“Naa kunoy usa ka empleyado nga giingong nakita-an sa iyang pamilya or anak ba to or wife nga naa sa iyang bulsa ang mga resibo kuno sa Palawan”, butyag ni Tumalabcab.

Sa iyang bahin, si Konsehal Joy Pesquera, chairman sa Committee on Women and Family Affairs Commission sa konseho nagkanayon nga daghan usab sila’g nadawat nga reklamo gikan sa mga kapikas batok sa usa ka empleyado o opisyal sa Cebu City hall.

Matud ni Pesquera nga ang ilang mahimo mao ang pagpahigayon og mediation alang sa duha ka partido.

Kabahin sa mga pasangil sa giingong Palawan Boys diin nalambigit ang mga empleyado sa JO, si Pesquera nagkanayon nga ilaha kining imbestigahan pinaagi sa Cebu City Legal. (BANAT NEWS)