Mga tawo nga nag-mask nipugos og sulod sa balay

CEBU, Philippines — Na-viral karon ang video nga gi-post Ahmz Suri diha sa Facebook kalabot sa upat ka mga lalaki nga giingong nipugos og sulod sa ilang balay ug nition og armas sa iyang manghud ug gipaluhod, insidente nahitabo sa Lungsod sa Dauis, Probinsiya sa Bohol niadtong Hulyo 20, 2024 sa alas 4:00 sa hapon.

Nagkanayon si alyas “Am-Am” ang nag-post sa video nga gikan sila sa merkado ug ang iyang amahan ug pagsulod niya sa ilang kural nakadungog siya nga nisinggit ang iyahang manghud nga lalaki nga nag-edad og 41-anyos.

Gipangutana niya ang usa sa mga lalaki nga naka-mask ug anaa sa gawas sa ilang balay kon unsay tuyo apan wala siya tubaga niini.

Gikatagbo usab niini ang laing lalaki nga nisulod sa ilaha nga naka-mask gihapon ug iyaha gihapong gipangutana kon unsay tuyo apan giingong wala gihapon siya tubaga.

Nakadungog ang iyang amahan sa komosyon maong nisulod sa ilang balay ug nangutana usab kini sa mga lalaki kon unsay tuyo nila ug kon polis ba sila apan giingong wala kini tubaga.

Matud ni Am-Am nga nisulti ang iyahang manghud nga pasulod siya sa ilang kural ug sa paglingi niini giingong gitionan siya og armas maong nidagan kini pasulod sa kwarto nga ilang gipatrabaho.

Giingong giapas ang iyang manghud ug gipatiran ang sin nga nagsilbing ali sa kwarto.

Nisaka ang ilang inahan sa kwarto ug nangutana gihapon kon unsay tuyo apan giingong giingnan kini nga dili mag-apil-apil kay walay labot.

Ug gumikan kay naabtan man nila wala madala sa mga lalaki ang iyahang manghud apan giingong nawala ang P3,000 nga kwarta ug jacket sa iyahang manghud.

Gikalro ni Am-Am nga wala nalambigit ang iyahang igsuon sa bisan unsa nga ilegal nga kalihokan.

Ang maong hitabo ilahang gi-report sa kapolisan ug desidido sila nga mopasaka og kaso.

Si Police Lieutenant Colonel Gerard Ace Pelare, tigpamaba ni Police Regional Office-7 nagkanayon nga hugot silang nakig-alayon ni Bohol Police Provincial Office Director Lorenzo Batuan.

Sa inisyal nga impormasyon nga ilang nakuha ang nakita sa video nga gi-post giingong mga miyembro sa Philippine National Police (PNP).

Adunay gihimong anti-drug operation ug base sa report sa BPPO giingong dunay nahitabong drug transaction nga nisangpot sa pagpahigayon og hot pursuit operation tungod kay nakaikyas ang suspetsado nga giingong nidagan padong sa balay nila ni Am-Am.

Gumikan kay legitimate operation ang BPPO mopasaka og kasong kalapasan sa Republic Act 9165 batok sa gigukod nga suspect.

Ang BPPO nipahigayon og internal investigation kabahin sa taho nga adunay  nahimong kalapasan ang kapolisan.

Ang mga polis nga nalambigit sa operasyon girelibohan kini samtang gipaubos sa imbestigasyon ug kong mapamatud-an nga aduna sila’y kalapasan  pahamtang sila og kasong administratiba ug kriminal. (BANAT NEWS)