Laing mga biktima sa pekeng doktor nipatim-aw

CEBU, Philippines — Laing mga biktima sa nagpailang peke nga doktor nga nadakpan sa National Bureau of Investigation sa ilang entrapment operation ang nipatim-aw sa buhatan sa NBI tungod kay ang taliwtiw nga ilong nga ilang gitunguha nahimo naman nga mura’g bato ka gahi ug sakit usab kaayo tungod sa pagpanghubag niini.

Diha sa social media nila nakaila ang suspetsado nga si Dimber Celis kinsa giingong nagpaila nga doctor ngadto sa mga biktima.

Ang suspetsado giingong nitanyag og tag P7 mil nga bayad alang sa pagpataas sa ilong nga gitawag og Hiko Nose Lift.

Apil sa mga biktima nga nidangop sa buhatan sa NBI-7 ang manag-inahan nga naingganyo nga mo-avail sa procedure aron mosamot ka gwapa ang iyang anak sa umaabot nga kasal niini sa buwan sa Septiyembre karong tuiga.

Ug tungod kay barato gi-enganyo sa kaslonon ang iyang umaabot nga ugangan nga magpa beauty enhancement.

Sa sinugdanan natagbaw ang mga biktima apan napulihan kini og stress tungod kay nausab naman ang ilang mga nawong.

Laing biktima nga nagpakitabang nibutyag nga igo ra unta nga gilibre ang iyang amega nga magpa-Hiko Nose Lift ug nagproblema na kini karon asa manguha og kwarta nga ipausab sa iyang ilong nga nadaot.

Ang mga biktima nipadayag nga ang suspetsado nagpaila kanila nga usa ka doktor.

Ang mga biktima nikomprontasi ngadto sa suspetsado nga nagtingkagol karon sa holding facility sa NBI-7 ug nagpakisayod sa substance nga gigamit niini sa pagtusok sa ilang ilong ug mata tungod kay mao kini ang gikinahanglan sa doktor nga moatiman kanila. Apan si Celis nibarug nga igo ra siya nihimo sa Hiko Thread ug walay laing substance.

Gihimakak usab niini nga nagpaila siya nga usa ka doktor tungod kay usa lang siya ka aesthetician.

Ang NBI-7 nibutyag nga adunay laing mga kaso ang suspetsado didto sa Iloilo City ug Dakbayan sa Butuan kalambigitan sa investment scam.

Napasakaan na og kasong Illegal Practice of Medicine ug Swindling ubos sa Revised Penal code in relation to section 6 of RA 10175 kun Cybercrime Prevention of 2012”. (BANAT NEWS)