Pres. Sergio Osmeña Sr. HS buksan sa siyudad sa Toledo

CEBU, Philippines — Pormal na nga gibuksan didto sa siyudad sa Toledo ang President Sergio Osmeña Sr. National High School sa Dumlog kagahapong adlawa Hulyo 24.

Ang edipisyo sa maong skwelahan gitukod pa karon kilid ra sab sa Dumlog Elementary School diin ang Grade 7 ug Grade 8 buksan alang sa school year 2024-2025 samtang wala pa hingpit mahuman ang building alang sa maong high school.

Sumala sa Toledo City Public Information Office nga pipila ka ekipo ang gihatag sa Department of Education alang sa maong tunghaan alang sa Brigada Eskwela niini.

Apil sa gihatag ang mga lingkoranan, lamesa, electric fans ug uban pa.

Ang mga magtutudlo sab sa maong skwelahan, gihatagan og P2, 500 nga allowance alang sa bulan sa Enero hangtud sa Mayo.

Si Mayor Marjorie “Joei” Perales maoy nangulo sa paglusad sa maong skwelahan sa high school nga gipaabot mapalapdan pa sa sunod ug maka serbisyo sa mga batan-on sa syudad sa Toledo.

Samtang sa laing bahin gipangandam sa Police Regional Office(PRO)-7 ang pagbukas sa klase karong Hulyo 29, 2024.

Sigon ni Police Lieutenant Colonel Gerard Ace Pelare, tigpamaba sa PRO-7 nga sila nagpahigayon og inventory kun pila ka eskwelahan ang naa sa Central Visayas.

Niabot sa 3,854 ka mga tunghaan ang magbukas og klase diin kasagaran niini mga pampublikong tunghaan.

"We start it when it open, mabantayan ninyo moapil mi sa Brigada eskwela, manglimpyo sa eskwelahan, magkig-meeting sa PTA because we really take it seriously as our function to make sure that safe atong mga schools", sigon ni Lt. Col. Pelare.

Ipakatap sab sa PRO-7 ang foot ug mobile patrols sa tanang tunghaan aron masiguro nga wala'y security issues hangtud nga mahuman ang school year. (BANAT NEWS)