Suspetsadong durogista giunay sa kauban og pusil patay
CEBU, Philippines — Patay ang usa ka 44-anyos nga lalaki human giulo pagpusil diha sa Sitio Lawis, Barangay Daanlungsod, Dakbayan sa Toledo niadtong Domingo sa gabii.
Ang biktima mao si Nestor Villoria Bayabos, residente sa lugar, adunay kaipon nadakpan niadtong tuig 2022 ug nakagawas sa samang tuig human maserbisyohi ang iyang sentensiya.
Base sa imbestigasyon sa kapolisan sa siyudad nga ang biktima giingong nalambigit gihapon sa ilegal nga drugas.
Gikataho nga usa ka sindikato sa ilegal nga drugas ang nagpaluyo sa pagpusil patay sa biktima tungod kay napakyas kini sa pag-remit sa halin sa drugas.
Si Bayabos nahimo usab kining informant sa kapolisan nga niresulta sa pagkasakmit sa kapin usa ka kilo nga drugas hinungdan nga gipatay kini sa drug group diin siya giingong miyembro.
Sa laing bahin, nikabat ngadto sa P2.8 milyones ang kantidad sa shabu nga nasakmit gikan sa duha ka pusher nga nadakpan atol sa buy-bust operations nga gipahigayon sa Mandaue City Police Office niadtong Domingo sa gabii.
Si Police Major Andy Michael Roque, hepe sa Police Station 1 sa MCPO maoy nangulo sa buy-bust operation ug nasikop ang usa ka 27-anyos nga suspetsadong high value individual nga pusher nga taga Barangay Paknaan sa maong dakbayan.
Nasakmit sa kapolisan gikan sa suspetsado ang 400 gramo nga shabu nga nikantidad ngadto sa P2.7 milyones.
Laing nadakpan mao ang 28-anyos nga pusher nga taga Barangay Banilad sa maong siyudad ug nakuhaan usab kini og 25 gramo nga shabu nga nagkantidad og P170,000 .
Ang team nga gipangulohan sa hepe sa City Intelligence Unit (CIU) sa MCPO nga si Police Lietenant Colonel Wilfredo Alarcon maoy nakasikop sa maong suspetsado.
Ang mga suspetsado gitanggomg karon sa holding facility sa MCPO ug gikatakdang pasakaan og kasong kalapasan sa Section 5 ug Section 11 ubos sa Article 2 sa Akta Republika 9165 kun “Comprehensive Dangerous Drug Act of 2002”. — Romeo T. Limpangog, Rowena D. Capistrano (BANAT NEWS)
- Latest
