Cash incentive gihatag sa mga atleta sa dakbayan nga nisalmot sa Palaro

CEBU, Philippines — Ang Cebu City Government nihatag og kinatibuk-ang P1.50 milyones nga cash incentives sa mga atleta gikan sa dakbayan sa Sugbo nga misalmot sa bag-o lang nahuman nga Palarong Pambansa 2024.

Kagahapon (Lunes), Hulyo 22, 2024, atol sa Flag Raising Ceremony atubangan sa Cebu City Hall labing minos 40 ka mga atleta ang gihatagan og cash incentives alang sa pagrepresentar sa dakbayan atol sa pinakadakong youth sporting event sa nasud.

Kadtong nakakuha og gold medal nakadawat og P50,000, ang mga silver medalist nakadawat og P15,000 samtang ang bronze medalist nakadawat og P10,000. Si acting Cebu City Mayor Raymond Alvin Garcia sa usa ka press conference sa samang adlaw nitug-an sa media nga nasabutan nila ni acting Vice Mayor Donaldo Hontiveros nga alang sa grupo, makadawat sila og mas dagkong kantidad sa incentives sama sa soccer ug basketball teams.

"Ang team sports man gud, even if 20 mo kabuok gaduwa, usa ra gyud na ka gold, so you're supposed to be entitled with only P20,000. Pero it's a team effort man so that's why we spread it," matud pa ni Garcia.

Hinuon siya niingon nga sa dance sports nga adunay lain-laing mga kategoriya, tagsa-tagsa silang gihatagan og mga incentives base sa medalya nga ilang nakuha.

Matud ni Garcia, ang cash incentives usa ka reflection sa pag-dugang sa budget alang sa sports commission sa siyudad nga iyang gitugutan alang sa 2025 fiscal year.

“It is just to show that the city government is very supportive of our athletes and very supportive sa atong mga sports programs kay makita man gud nato nga kaya man gud nato,” matud ni Garcia.

Siya midugang nga ang suporta gikan sa gobyerno mahinungdanon aron makab-ot ang kalampusan sa matag atleta aron makab-ot sab ang ilang mga tumong. Sa pagkakaron, adunay duha ka Cebuano Olympians nga ni compete sa Paris alang sa weightlifting nga nagrepresentar sa nasod.

Ang Cebu City Government mopahigayon usab og appreciation dinner karong Hulyo 31, 2024, alang sa Palarong Pambansa committees ug mga atleta nga nirepresentar sa Cebu City ug Central Visayas atol sa Palaro. Ilhon ug pasidunggan sila pinaagi sa plaque of appreciation. (BANAT NEWS)