BAYAN: Grado ni Marcos ‘zero’

CEBU, Philippines — Moabot sa 300 ka mga indibidwal ang nagmartsa ug mipadayag sa ilang kasagmuyo sa pakyas nga pagtuman ni Presidente Ferdinand Marcos Jr. sa iyang mga saad atol sa ikatulong State of the Nation Address (SONA) niini.

Nagkalain-laing progresibong grupo sama sa Bagong Alyansa Makabayan (BAYAN) Central Visayas mihatag og grado nga “zero” sa labok ni Marcos sa nakalabay nga tuig atol sa gipahigayon nilang gitawag nga People's SONA.

Nihimo og programa sa Fuente Osmeña Circle ug nagmartsa sa paingon sa Police Regional Office(PRO)-7 dayon sa dalan Colon  ug didto gihimo ang ilahang programa.

"Among ihatag nga grado palpak unya hagbong ang atong presidente para sa mga ordinary, unya zero kung i-average nato og 1-10, unya kinsa may naka benepisyo sa iyang Bagong Pilipinas?," sigon ni Jaime Paglinawan, Chair sa Bayan Central Visayas. 

Pipila sa mga giyangongo sa grupo mao ang ubos kaayong suholan sa mga mamumuo taliwa sa nagkataas nga presyo sa mga palaliton.

Gisaway sab nila ang gobyerno sa pakyas nga pagtuman sa saad sama sa pagpakunhod sa presyo sa bugas ngadto sa P20 kada kilo. Si Cebu City Police Office Director Colonel Ireneo Dalogdog miingon nga malinawon ra nga nahuman ang rally.

Wala sab mabalda ang dagan sa trapiko tungod kay dunay mga traffic enforcers sa Cebu City Transportation Office ug CT-TODA sa habig sa Talisay City nga nagbantay sa kadalanan.

Si Police Lieutenant Colonel Gerard Ace Pelare, tigpamaba sa PRO-7 miingon malinawon ang tibuok rehiyon atol sa SONA.

Gipatuman ang maximum tolerance ug gihatagan og higayon ang mga progresibong grupo nga makapadayag sa ilang mga yangungo. — Rowena Capistrano, Gabriel Bonjoc (BANAT NEWS)