Senior citizen nang-gate crash sa kasal, nangawat

CEBU, Philippines — Usa ka 63-anyos nga babaye’ng senior citizen gipasanginlang nang gate crash sa reception sa mass wedding ug nanguha matud pa og bag sa usa sa mga bisita.

Ang maong senior citizen gidakop ug nagtingkagol  sa Mambaling Police Station 11 sa Cebu City Police Office niadtong Sabado sa gabii, Hunyo 29, 2024 human sa iyang gibuhat diha sa Sitio Viking, Barangay Mambaling, siyudad sa Sugbo.

Ang gidakop taga dakbayan sa Toledo samtang ang biktima usa ka 56 anyos, residente sa Sitio Wangyu sa maong barangay nga bisita sa maong kasal.

Nagkanayon si Patrolman Felmar Gomez, imbestigador sa Mambaling Police Station 11, samtang naglingkod ang biktima sa usa sa mga lingkuranan sa lamesa, kalit nga mitupad ang suspek.

Pagkataud-taod giingong gikuha niini ang bag sa biktima nga gibutang sa iyang kilid ug gikatahong gipasa sa kauban niini ug pagkahuman dalidaling nanggawas.

Swerte nga nabantayan sa kauban sa biktima ang pagkuha sa bag sa dihang gipangita kini sa biktima ug dalidali nilang gigukod ang suspek.

Ang suspek kusganong milimod sa pasangil nga dunay nakakita kaniya nga siya maoy mipunit sa bag ug gipasa sa kauban.

Nasayran nga ang itom nga bag sa biktima adunay alahas nga nagkantidad og P20,000, IDs ug cash nga nagkantidad og P10,000.  Karong adlawa pasakaan og kasong pagpangawat ang suspetasado.

Nasayran nga niadtong buwan sa Marso ning tuiga ang suspetsado gidakop sab kay nikaon og karenderya nga wala mobayad apan nahusay kini tungod kay gibayran nila ilahang gikaon. (BANAT NEWS)