Publiko dunay kaakohan pagpakgang sa baha

CEBU, Philippines — Giawhag ni Acting Mayor Raymond Alvin Garcia ang katawhan nga mohimo  sa ilang kaakohan pagtabang pagpangita og solusyon batok sa pagbaha.

Sumala pa ni Garcia dili gyud unta magpataka og labay sa ilang mga basura tungod kay makabara kini sa mga agianan sa tubig nga maoy hinungdan sa pagbaha kung mobunok ang uwan.

Makigtagbo usab si Garcia alang usa ka coordination meeting uban ang mga nagkadaiyang opisina ug government agencies karong semanaha aron pagpangita’g solusyon batk sa baha sa nilabay nga mga adlaw tungod sa kusog nga ulan.

Gipahimug-atan ni Garcia gikinahanglan ang panaghiusa sa tanan sa pagplano atol sa ilang tigum uban ang mga representante sa Task Force Gubat sa Baha, Department of Engineering and Public Work, Department of Public Works and Highways aron sa pagsiguro nga malikayan ang pagdoble-doble sa mga angayan nga buhaton para sa pagtubag sa problema sa baha.

Apil sa tukion mao ang pagpamalit sa mga gikinahanglang gamit ug pag-abang og mga heavy equipment para sa pagpalawom ug paglimpyo sa mga sapa.

Sa laing bahin, gipaalerto 24  oras ang mga sakop sa Barangay Emergency Response Teams sa Dakbayan sa Mandaue nunot sa nasinating baha diha sa mga tiilang bahin sa Marcelo Fernan Bridge ug Mandaue-Mactan Bridge sa miaging gabii.

Ubay-ubay nga mga sakyanan ug motorsiklo ang napagngan diha sa tiilan sa Mandaue-Mactan Bridge.

Pipila sa mga motorista ang nireklamo tungod kay duna man tuod mga sakop sa DRRMOs sa lugar, apan nagtan-aw ra inay pagtabang o ba kaha paggiya sa mga drayber kun asa pabor moagi.

Dunay uban nga mibalik sa agi ug nisuway paglabang sa Marcelo Fernan Bridge apan mao gihapon ang sitwasyon sa atbang sa usa ka dakong tindahan sa mga hardwares padung sa maong taytayan.

Tungod niini, dunay mga nagmotor nga namalik sa agi ug nilusot sa pikas nga lane ug nagtinabangay pagsaka sa center island aron makabalik sa lane padung sa Lapu-Lapu City. (BANAT NEWS)