Nangilkil ug nanghulga sa pagpakatap sa usa ka sex video gidakop

CEBU, Philippines — Duha ka tawo ang nasikop sa mga tinugyanan sa National Bureau of Investigation NBI Central Visayas human kini nangilkil sa usa ka magpapatigayon bugti sa dili pagpakatap sa sex video niini kuyog sa usa ka lalaki.

Ang maong entrapment operation tali sa duha ka mga suspetsado gipahigayon sulod sa usa ka mall ning Dakbayan sa Sugbo niadtong Martes.

Ang mga nasikop naila nga sila si Jaime Ferrer Jr ug Raul Dumagil, puros hingkod ang mga pangidaron.

Suma pa sa mga opisyal sa NBI-7 nga ang mga suspetsado kinsa giingong higala ug business associate sa biktima nangayo ug P70mil bugti sa dili pagpagawas sa nahisgutang sex video.

Nangayo na usab kini ug dugang usa ka milyon ka pesos aron ang maong videos ug hulagway dili ipakita ngadto sa pamilya sa biktima.

Ang mga suspetsado nipakita usab sa video sa usa sa mga higala sa biktima ug nangayo pa kini sila ug pahalipay.

Gumikan niini ang abogado sa biktima nidangop sa buhatan sa NBI-7 ug nagpakitabang hinungdan nga gihimo ang entrapment operation batok sa mga suspetsado diin gidawat nila ang P200mil nga kwarta aron dili ipublikar ug i- delete ang video sa biktima kuyog ang usa ka lalaki.

Ang mga suspetsado gipaubos na sa inquest proceeding ug gipasakaan og kaso nga violation of RA 9995 o mas naila nga Anti-Photo and Video Voyeurism Act of 2009. (BANAT NEWS)