Biometrics exemptions sa mga kawani sa city hall gi-revoke

CEBU, Philippines — Gimando ni acting Cebu City Mayor Raymond Alvin Garcia nga i-revoke ang tanang biometrics exemptions nonot sa mga alegasyon nga dunay mga anomaliya sa Daily Time Record (DTR) sa mga kawani sa Cebu City Hall.

Ang maong kamanduan gipahibawo ni Garcia atol sa press conference kagahapon Lunes, June 10, 2024.

Iyang gimanduan ang Human Resource Development Office (HRDO), ug ang Office of the City Administrator kabahin sa revocation sa DTR exemptions ug magsugod kini kagahapon.

Giklaro ni Garcia nga wala kini magpasabot nga dili na maka apply og biometric exemption ang mga empleyado.

Mamahimo ra gihapon mag-apply ang mga empleyado og biometric exemption, pero kinahanglan sila mosumitir og suwat kung nganung ilang gikinahanglan ang exemption.

“That’s clear. Basta, I have revoked all biometric exemptions. But of course, they can reapply or they can come to me,” suma pa ni Garcia.

Una niini niadtong Hunyo 7, 2024, ang department head sa Management Information and Computer Services (MICS) nihimakak sa alegasyon nga matud pa nagsige siya og dawat og sweldo bisan og wa mo report sa trabaho segun sa mikatap sa social media.

Aduna usay post sa social media nga nagbulgar sa giingong DTR “scam” sulod sa Cebu City Hall.

Ang maong post naghisgot sa MICS Department Head nga si Dante Villor Arcilla nga naila usab nga Dax Arcilla nga maoy gialigar nga nagdawat og full salary bisan og way entry sa biometrics sa DTR.

“Atong gihangyo ang Civil Service Commission ug Office of the Ombudsman nga tanawon ni ang DTR scam sa Cebu City Hall kay dili ni mahimo ni Dax Arcilla kon walay kakunsabo sa HRDO ug sa Mayor's Office,” pagbasa maong post.

Ang susamang post sa social media diin gi attached ang empty DTR record ang naghangyo usab og imbestigasyon batok kang Arcilla.

Sa dihang nahinabi sa mga tigbalita, si Arcilla miklaro nga ang gi-attached nga photo sa maong post mao ang record sa niaging tuig pa,siya midugang nga ang maong DTR document wa pa ma fill out. Giklaro niini ang iyang routine sa trabaho nga personal nga moreport ngadto sa mayor ug sa city administrator nga pulos maka attest sa iyang attendance sa trabaho. (BANAT NEWS)