Mandaue nangandam sa batok sa baha

CEBU, Philippines — Gimando ni Mayor Jonas Cortes ang mga pagpangandam batok sa baha panahon sa pagbunok sa kusog nga ulan.

Ang  mga personnel  sa  Mandaue  City Engineering Office maoy  kasamtangan  nilang gihimo ang pagpanglimpiyo sa outfall sa Tipolo Creek  nga nahimutang sa Barangay Centro.

Gawas sa mga drainage ug manhole maoy ilang gihimo ang pagpanglimpiyo usab sa mga outfall sa tubig sa mga sapa.

Ang Mandaue Task Force APAS (Atoang Problema, Atoang Sulbaron) aktibong nagpahigayon og declogging sa mga drainage system isip pagpangandam sa ting-uwan.

Sukad niadtong buwan sa Enero niining tuiga moabot na sa 3,000 linear meters nga mga drainage line ang nalimpyohan sa task force.

Sa laing bahin, hugot nga gipahimangnoan sa health officials sa Siyudad  sa Lapu-Lapu ang mga molupyo sa kabarangayan nga dili gayod mokompiyansa sa sakit nga dengue bisan pa sa gikataho nga pagkunhod sa mga kaso nga naglambigit niini sa unang lima ka bulan niining tuiga.

Matud ni Dr.  Agnes Realiza, pangulo  sa Lapu-Lapu City Health Office (CHO) nga kanunay nga himuon sa matag molupyo sa kabarangayan ang 5-S strategy sa  pakibatok sa sakit nga dengue.

Nasayran nga ang siyudad nakatala og hilabihan nga pagkunhod sa kaso sa dengue apan bisan pa niini padayon ang ilang mga pagbantay. — BDB BANAT NEWS