Garcia misugyot og direct flight sa Russia dinhi sa Sugbo
CEBU, Philippines — Gihangop sa Federal Agency for Air Transport Agency (FAATA) sa Russian Federation ang proposal ni Gobernador Gwendolyn Garcua nga mag-abli og direktang flights o byahe sa eroplano padulong ug gikan sa Russia ug sa Sugbo.
Atol sa tigom ni Garcia uban sa pangulo sa Department of Transportation Regulation and International Cooperation sa FAATA nga si Lev Kosinov, nagkanayon nga bukas sila sa posibilidad nga adunay direktang byahe sa eroplano gikan sa Russia padulong sa Mactan Cebu International Airport (MCIA) hangtod nga adunay "market" nga makapalahutay ug makabenipisyo sa ilang gobyerno ug mga tawo.
“I have spoken to Aeroflot a while ago and they are interested to explore these destinations, especially if there is a demand from travel agencies,” matud ni Kosinov sa pulong nga Russian nga gitranslate sa interpreter sa pulong nga English.
Sa pagkakaron, matud ni Kosinov wala pa silay nakita nga taas nga demand aron maka-operate og commercial flights. Hinoon suma sa maong Russian nga opisyal, kini makab-ot pinaagi sa agresibo nga "marketing" nga mahimo sa mga travel agencies.
Sa taho sa Sugbo News, ang news portal sa Probinsiya sa Sugbo, si Kosinov misugyot nga gawas sa direkta nga flight gikan St. Petersburg padulong sa Cebu, mamahimo sab nga adunay flights gikan Moscow.
“Why not start from Moscow? From my commercial point of view, Moscow will be more logical and profitable,” matud sab ni Garcia ngadto kang Kosinov.
Sumala ni Kosinov nga base sa market indicator nila sa mga airlines nga mibyahe padulong sa Sugbo sa niaging tuig, anaa na kini sa 87 porsyento apan kinahanglan nga makakab-ot og 92% nga rekisitos aron mamahimong aduna na gyuy commercial flights.
Si Garcia nagkanayon sa Russian government nga ang pag establisar og direktang flight gikan ug padulong sa Sugbo ug Russia dili lang alang sa tourismo, sanglit abli man sab ang Sugbo sa investment gikan sa Russia. Si Garcia uban sa ubang delegado sa Probinisya sa Sugbo tua sa Russia aron pag renew sa sisterhood agreement tali sa Sugbo ug sa St. Petersburg ug pagtambong usab sa usa ka economic forum. (BANAT NEWS)
- Latest
