Garcia nakigtagbo sa contractor sa guba hospital

CEBU, Philippines — Gipakigtagbuan ni acting Cebu City mayor Raymond Alvin Garcia ang contractor sa Guba Community Hospital kagahapon (Miyerkules) aron sayran nganong nalangay ang pagtrabaho sa expansion sa maong tambalanan.

Si Garcia nakigtagbo na usab sa pangu sa Cebu City Medical Center, Dr. Peter Mancao ug City Health Department Chief Dr. Daisy Villa, ug didto nasayran ang problema nga mao ang kakuwang sa building permit ug occupancy permit.

Niadtong Martes, Hunyo 4, 2024, ang Office of the Building Official (OBO) mikompirmar nga ang Guba Hospital wala makabaton og building permit aron mopadayon sa construction og dugay na kini nga na-isyuhan og notice of illegal construction ug work stoppage order.

Sumala pa ni Garcia, gusto niyang masayran nganung niabot pa ug dili mominos sa unom ka tuig nganung wala makakuha ug building ug occupancy permit ang maong tambalanan.

“Gipaningkamot unta nila sa contractor, kay ang contractor may muapply ana, although the funds come from the Department of Health, the contractor is contracted out for the rehabilitation of the Guba Hospital,” suma pa ni Garcia.

Maoy tinguha ni Garcia, nga magamit na gayud ang tambalan ilabi na ang phase 1 niini naa sa 95percent nga nahuman samtang ang phase 2 nagpadayon pa ang construction.

Gipasalig ni Architect Florante Catalan, ang pangulo sa OBO nga dili mominos sa usa ka oras lang ang pagproseso sa business permit sa ilang buhatan kung sakto lang kini sa mga    rekisitos.

Gikatahu niadtong December 5, 2023, ang Alsher Construction, ang contractor sa proyekto, misumitir og explanation letter ngadto sa OBO. Lakip sa ilang gihimug-atan nga ang maong proyekto dunay upat ka contractor ug sila ang labing uwahi.

Segun sa ilang pagpasabot sila gihatagan og resumption order aron mapadayon ang construction nga way building permit niadtong tuig 2021.

Gipasaligan usab sila nga humanon ang application alang sa permit.

Niadtong March 6, 2024, ang CLO ni-isyu og resolution nga nag-awhag sa contractor nga mo-comply sa building permit, uban sa occupancy permit gikan sa OBO sulod sa 60 ka adlaw. (BANAT NEWS)