Pagsuspenso sa klase tungod sa kainit sa panahon giduso
CEBU, Philippines — Niduso og resolusyon si Cebu City South District Councilor Rey Gealon nga naghangyo kang Mayor Michael Rama nga ikonsiderar ang pagsuspenso sa klase sa mga adlaw nga dunay grabeng kataas sa temperatura sa kainit sa adlaw alang sa kaluwasan sa mga tinun-an.
Nag-ugat ang resolusyon ni Gealon gikan sa pasidaan nga gihatag sa publiko nga posibleng moabot ngadto sa 51 degrees Celsius ang heat index sa Sugbo sa umaabot nga mga buwan.
Gibasehan ni Gealon ang pamahayag sa weather specialist nga si Jhomer Eclarino sa Philippine Atmospheric, Geophysical and Astronomical Services Administration (Pagasa) Visayas nga ang 51 degrees kay gi-categorize nga peligro.
Gikutlo usab ni Gealon ang kasayoran nga sa kini nga level, ang mga tawo mahimong makasinati sa kakapoy sa kainit , ug bisan sa heatstroke taliwala sa padayon nga mga kalihokan sa gawas.
Tungod kay duna nay mga klase sa ubang lokal nga kagamhanan ang misuspenso sa klase tungod sa pagsaka sa temperatura, si Gealon miingon nga makiangayon usab nga kini ang buhaton dinhi sa dakbayan.
Si Cebu City Mayor Michael Rama sa iyang bahin miingon nga ang mga tagdumala sa tunghaan sama sa prinsipal maoy nasayod sa sitwasyon sa tagsa-tagsa nila ka mga area busa kini ang angayan nga mohukom kun angayan ba suspensohon ang klase.
Sa interbyu sa programang Sentro sa XFM, si DepEd-7 regional director Salustiano Jimenez miingon nga otorisado na ang mga prinsipal pagdesisyon kun kanselahon ang klase ug mag-modular learning ang mga bata kun molapas sa 40 degrees Celsius ang kainiton sa panahon.
Apan bisan gani dili kaabot niini kun sa tan-aw sa prinsipal nga kuyaw para sa mga bata ilabi na kun lagyo pa og ulian, pwedeng ipaagi sa modules ang klase basta pahibaw-on lang ang ilang superintendents ug regional office lakip na ang ilang local government units.
Si Gealon nanawagan sab sa Cebu City Disaster Risk Reduction and Management Office nga mohimo og lapad nga information campaign sa kabaranggayan kun unsay angay buhaton sa panahon sa ting-init.
Giawhag usab niini ang Department of Education (DepEd) nga mohimo og lakang alang sa paghinumdom sa mga tinun-an kabahin niini. IBM BANAT NEWS
- Latest
