P2.7 milyong shabu nasakmit

CEBU, Philippines — Nadakpan sa City Intelligence Unit sa Cebu City Police Office (CCPO) ang usa ka Priority Regional Level Drug personality sa ilang buy-bust operation sa Nivel Hills, Barangay Busay, siyudad sa Sugbo, Lunes sa gabie, Marso 4, 2024.

Ang dinakpan mao si Jemark Magdadaro Paragile alyas Jimjim, 30, residente sa Sitio Huyonghuyong, Barangay Bacayan, ning siyudad.

Nakuhaan ang suspetsado og 400 gramos sa gituohang shabu nga mobalor og P2.7 million.  Giingong Talamban ug Busay ug ang area of operations sa suspetsado.

Samtang usa ka job order employee sa Barangay Mambaling ang nadakpan sa buy-bust operation sa mga tinugyanan sa PDEA RO VII uban sa PNP RIU sa may Vestil Street, Barangay Mambaling sa Dakbayan sa Sugbo sa nilabay nga adlaw.

Ang dinakpan nga si Jason Tahir, 38, naila nga usa ka PDEA-PNP Regional Target List. Nasakmit gikan sa dinakpan ang unom ka mga putos sa gituohan nga shabu.  Duha ka mga drug groups ang gi-monitor sa Police Regional Office (PRO)-7 nga posibleng naglihok sa Central Visayas ilabi na sa pagpalusot og mga binulto nga ilegal nga drugas nga nasakmit usab sa kapulisan.

Matud ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin kaning maong mga grupo pirmeng mogawas sa mga briefings sa mga impormasyong ilang nakuha gikan sa sa ilang nga nadakpan.

Una niini, ubay-ubay na nga mga illegal nga drugas ang nasakmit sa mga operatiba sa PRO-7 partikular na dinhi sa Sugbo ingon man sa Probinsiya sa Bohol.

Si Pelare miingon nga epektibo ang intelligence operations sa PRO-7 maong daghan ang nangadakpan ug binulto ang makuha.

Ang mga illegal nga drugas gipalusot sa Central Visayas gikan sa Luzon agi sa mga pantalan o roro ports. Rowena Capistrano IBM BANAT NEWS