Walo ka drug dens

CEBU, Philippines — Gikan sa buwan sa Enero tuig 2024 hantod sa kasamtangang petsa sa buwan sa Pebrero ning tuiga walo na ka drug dens ang naguba sa operasyon sa Philippine Drug Enforcement Agency (PDEA)-7 ug Police Regional Office (PRO)-7 .

Matud ni Leia Alcantara, tigpamaba sa PDEA-7 nga gitutukan gyud nila kining drug den kay kini gikonsiderar nila nga high impact operation kay anha magsugod ang naghimo og mga krimen.

Drug Dens

Sa walo ka drug dens, ang lima niini naa sa Cebu City, usa sa Tagbilaran City ug duha sa Lungsod sa San Francisco, Isla sa Camotes, Probinsiya sa Sugbo.

Gipasabot ni Alcantara nga bisan ang usa ka barangay gideklarar nga drug cleared sama sa Lungsod sa San Francisco wala kini magpasabot nga dili na sila masudlan og illegal nga drugas.

“It is part of the reality, it is part of the process of drug clearing operation nga naa gyuy mga gi conduct nga buy-bust operation ang mga police gihapon…I think karon naa gihapon na nga misconception nga basta drug cleared Barangay dapat kuno wala na gyuy i-conduct nga anti-illegal drug operation ang police o ang PDEA, that is a misconception kay again dili man gyud na nato unless koralon nato atong mga Barangay, naa gyud tay possibility nga masudlan,” sigon ni Alcantara.

Timailhan sab kini matud pa nga  naglihok ang mga barangay officials ilabi na ang ilang Barangay Anti-Drug Abuse Council (BADAC) pinaagi sa pag-report kun kinsa ang mga nalambigit sa ilegal nga drugas.

Kasagaran sa mga drug dens nga naguba mga balay kini sa ilang dinakpan unya gihimong drug den, ang mosulod naay bayad ug lahi sab ang bayad sa mogamit sa illegal nga drugas.

Nangadakpan

Niadto lang Huwebes sa gabii, lima ka tawo ang gisikop sa PDEA-7 ug Mambaling Police Station gikan sa usa ka drug den sa Maya Street, Barangay Basak San Nicolas ning Dakbayan sa Sugbo.

Nasikop mao ang tigmentinar sa drug den nga si Jonathan Sollo, 41, walay trabaho kinsa nasamdan human suway nga mieskapo.

Apil sa gisikop usab ang pag-umangkon niini John Rey Sollo, 25 ug mga parokyano nga sila si Noel Radazam 40; Vingie Tapere,46,driver; Archie Mabaso,43.

Nasakmit gikan sa maong mga dinakpan ang upat ka putos sa gituohang shabu nga motimbang og 15 gramos nga mobalor og P102 mil, buy-bust money ug kagamitan sa pagsuyop og shabu.

Si Alcantara miingon nga si Sollo nga nagpadagan sa maong drug den nakapiyansa niadto lang Disyembre 2021 sa kaso gihapon sa ilegal nga drugas.

Usa ka kilong shabu

Samtang usa ka Sydney Dialimas, alyas Rack Rack,57, ang nasikop sa mga sakop sa City Intelligence Unit/City Drug Enforcement Unit sa may Zone 7, Barangay Mantuyong, Mandaue City kagahapon sa kaadlawon adlaw nga Biyernes.

Si Dialimas giingong High Value Individual Regional Level ug anaa usab kini sa watchlist sa PDEA.

 Nasakmit gikan kaniya ang usa ka kilong gituohang shabu nga mobalor ug P6.8 milyones ug buy-bust money.

Siya maoy gitumbok nga maoy tinubdan sa shabu niadtong detainee sa Abuyog Penal Colony ug aduna usab siyay mga downlines sa Mandaue City, Lapu-lapu City ug Talisay City. 

Background

Nasuta sab sa background niini nga nalambigit kini og mga krimen kaniadto ug napriso niadtong 1984 tungod sa highway robbery. Niadtong 1991 gikan sa New Bilibid Prison gibalhin siya ngadto sa Iwahig Prison ug nakagawas.

Apan tuig 1994 nadakpan nasab kini sa kasong paghupot og armas ug paglapas sa parole provisions, napriso siya gikan CPDRC ngadto balik sa Muntinlupa; gikan sa 2010 ngadto sa Sept 1, 2024 napriso na sab siya sa Abuyog Penal Colony tungod sa kasong homicide. Ang mga dinakpan nagtingkagol na karon sa lock-up jail og gipaabot ang pagpasang-at og tukma nga kaso kanila.Romeo Limpangog IBM BANAT NEWS